Qui fit, Maecenas, ut nemo, quam sibi sortem seu ratio dederit seu fors obiecerit, illa contentus vivat laudet diversa sequentes? "O fortunati mercatores", gravis annis miles ait, multo iam fractus membra labore. Contra mercator navim iactantibus Austris: "Militia est potior. Quid enim? Concurritur: horae momento cita mors venit aut victoria laeta." Agricolam laudat iuris legumque peritus, sub galli cantum consultor ubi ostia pulsat. Ille, datis vadibus qui rure extractus in urbem est, solos felices viventes clamat in urbe. Quo rem deducam? Si quis deus "En ego", dicat "iam faciam, quod voltis: eris tu, qui modo miles, mercator; tu, consultus modo, rusticus: hinc vos, vos hinc mutatis discedite partibus. Eia!" Inde fit, ut raro, qui se vixisse beatum dicat et exacto contentus tempore vita cedat uti conviva satur, reperire queamus.
|