De nocte Latina Vindobonae celebranda

[Zythophilus]

Cras, ubi lux solis modo cesserit alma tenebris,

cras NOX, cui faueat Musa, LATINA cadet.

Condita ab Iliadis geminis tunc moenia credes,

per quae Danubius se tamen ire docet.

http://www.nox-latina.at.tf

[Medicus domesticus]

Rem iucundissimam tu vobis monstras! Tali spectaculo admirabili Lingua Latina vivificabitur, mi Zythophile, et certe discipuli nocte latina laetabuntur.

Vale feliciter,
tibi dicit medicus montanus bavaricus.

[philistion]

Salve Zytophile,

Facietne Sodalidas quoque "Noctem Graecam"?

Vale!

[Zythophilus]

SALVE
Noctem Graecam fieri non puto, sed nocte Latina res ad linguam Graecam pertinentes etiam monstrantur uel saltem monstrari possunt. Paucis in scholis linguam Graecam doceri scito, ut nec sint multi, qui eam discant, nec multi, qui doceant. Nocti ergo modo rebus Graecis deditae non multos interfuturos fuisse puto.
VALE

[Zythophilus]

Hac omnes alacres Romani nocte uidemur

et quidam tunica membra togaue tegunt.

Disce cibos hodie Romano more parare.

Ludere si libeat, lude merumue roga.

Pagina docta placet nec desunt multa iocosa.

Mortua quae dicta est, lingua Latina uiget.

En, tibi quae placeant, possum res mille referre:

Gaudet cum superis Romulus ipse. Veni!

[Medicus domesticus]

Salve iterum, Zythophile,

Te rogo, ut nobis dicas:
Nox Latina felicem exitum habuit et bene prospereque successit?
Multi homines et discipuli interfuerunt Nocti Latinae?

Si nobis ea narraveris, laetabor.

Vale.

[Zythophilus]

Accidit, ut multos uisuros munera Romae

nox illa attraheret, noxque peracta bene est.

Hanc scit post noctem, si quis dubitauerit ante,

non modo sermonem nocte uigere nigra.

[Zythophilus]

Vbi imagines Noctis Latinae mirari licebit, locum earum hic indicabo.