Nugae

[Zythophilus]

Hoc Scriptura die Christum cruce Sancta necari

et tumulo narrat mortua membra dari.

https://upload.wikimedia.org/wikipedia/ ... roject.jpg

[Zythophilus]

Nocte sacerdotes miserunt arma gerentes,

ut peteret Dominum turma repente procax.

Quem data militibus monstrarunt oscula in horto

. quid facit argenti pessima saepe fames?

Discipulos uetuit sese defendere Christus,

ne flueret calidus capta per arma cruor,

sed tibi, Malche, Petrus decidit feruidus aurem

et iussit Dominus condere tela suos.

Hinc sine discipulis ex horto abductus Iesus

atque unum placuit deinde necare uirum.

Ter Petrus hunc hominem timidus se nosse negauit,

dum lacrimas fundi rauca coegit auis.

Imposita interea regi spinosa corona est

et tormenta potest uix tolerare dolens;

ora saliua ferit iam pallida morte futura

et portare crucem cogitur ipse miser.

Te crux crudelis, Domine et rex noster, ademit,

uitaque Pilato rapta iubente tibi est.

Heu, tua nunc sine te desperat turba fidelis

consilioque ducis licta repente caret.

Quid faciant, miseri ignorant absente magistro

flentque, quod est omnis perdita morte salus.

https://image.kurier.at/images/cfs_land ... 069589.jpg

[Zythophilus]

Te negat occisum rediturum maesta caterua,

atro dum tumulo, Christe redemptor, ines,

dumque iaces sub humo, tristes lacrimantur amici

et fugiunt timidi sollicante metu.

Morte iubente taces, cui dulcia uerba fuere,

et subito casu, quae ualuere, ruunt.

https://encrypted-tbn0.gstatic.com/imag ... w&usqp=CAU

[Zythophilus]

Qui modo Tartareas petiisti, Christe, tenebras,

ut situs in tumulis et sine mente fores,

tertia te lux hinc ad uitam surgere cernit,

et, quos eripuit mors, reuocare paras.

Fracta tenebrarum sunt a te uincla, redemptor,

nec te mors potuit dura tenere diu.

https://img.welt.de/img/debatte/komment ... um-Unt.jpg

[Zythophilus]

Nobis somnus erat, cum facta est haec breuior nox;

lucet, cum foueat sol, prius orta dies.

[Zythophilus]

Ex Afris calidis apportat uentus arenam,

quae fuscat medium nube uolante diem.

https://www.dw.com/en/sahara-dust-cloud ... a-68705280

[Zythophilus]

Bisencii uinariae merum cellae
promunt et explent dolia hoc lagoenasque.

[Zythophilus]

Efficit unda fluens alto sub monte Timauum

mutatoque nouo nomine fonte redit.

Nesciuere diu tectum percurrere flumen

et fluere ex antris ardua post iuga idem.

https://www.kleinezeitung.at/kaernten/a ... ationsfund

[Zythophilus]

Est a discipulis urbs sancta relicta duobus,

tristis uti posset mens requiete frui,

cum nollet Domini memor esse uiator uterque,

quem prius abstulerat mors cruce saeua et atrox.

A sociis petitur non laetis uiculus Emmaus

et loca tristitiae linquere plena iuuat.

Tertius interea cum se spatiantibus addit,

ingentem memorant spem periisse suam.

Dum fit iter, comites iter hoc effecit amicos

et placuit sociis plana loquela tribus.

Horrendum facinus tremefactus uterque renarrat,

curque nihil mirans nouerit ille, rogant.

Fata redemptori nouus explicat apta sodalis,

hac sit cum Dominum morte necesse mori.

Quae cito praetereunt, fallunt sermonibus horas,

cum fugiente die denique uesper adest.

Cum dicens sociis paret aduena abire salutem,

ne sese miseros linquat, uterque petit.

Ille manens panem confringit more sacrato,

ut comitem Christum noscere uterque queat.

https://www.pius-kirchgessner.de/07_Bil ... maus_5.jpg

[Zythophilus]

Germanis iam non prohibetur cannabis acris

ut cerebra inuadat debiltitetque uapor.

[Zythophilus]

Quae fuit ante, redit festis paschalibus actis

uita, sed effugiunt otia grata tamen.

Oua uoranda manent – cui non est copia magna? –

quae pueri leporis munera cocta putant,

prataque iam uariis ornantur floribus ortis

et nos uere frui tempora grata iubent.

[Zythophilus]

Et niueis cerasi candentes floribus ardent

et, quae mella legunt dulcia, aluntur apes.

Densa rubros nobis promittunt ramalia fetus

et gaudebit auis tum cerasa aucta uorans.

[Zythophilus]

Accipietne boues dono Germania Lucas?

Africa enim has dono uult dare grata feras.

https://www.theguardian.com/world/2024/ ... unting-row

[Zythophilus]

Qui tacitus fuerat, modo grata silentia rupit

et reliquos stultos nuntiat esse loquax.

Vocis iter reducem scelerosae claudere uellem

dormitumque – uocat lectulus! – ire simul.

[Zythophilus]

Cur miscere merum spumanti possumus undae?

Hungarus inuenit talia uasa sagax.