Nugae

[medicus]

Saron rex est, qui venatus (in venando) mortuus est.

Vae, me inscium!

[Zythophilus]

Crastina cum gelidas tenebras Aurora fugarit

atque etiam, dulcis Somne, fugatus eris,

linqueturque mihi domus et proficiscar Athenas:

Caupo iam laticum dolia magna para!

[Zythophilus]

Portus Athenarum nobis Piraeus aditur,
salsa ut nos placidi mulceat aura maris.
Quae redeunt et eunt, naues fert merce grauatas
aequor et accipiunt multa feruntque rates.
Rex his fertur aquis cerua fugiente perisse;
hoc mare ab illius nomine nomen habet.

[Zythophilus]

Vnde profectus erat Theseus, pueris ut adesset,

quos esura foret Gnosia bestia atrox,

huc iter est factum. Non solum quaerere prisca

tecta, sed humoris pocula plena placet.

[marcus03]

sed humoris pocula plena placet.

Mihi verbum "imprimis" deesse videtur, quidem quod non ad metrum, sed quod ad argumentum attinet.

[Zythophilus]

Vnde profectus erat Theseus, pueris ut adesset,

quos esura foret Gnosia belua atrox,

huc iter est factum. Fora nota domusque requiro,

quae reuocant opibus tempora prisca suis.

Circa Cecropiam quid fiat, quaeritis, arcem

atque, ubi adhuc homines edere Graeca solent.

Arcis uti ueteres possimus conspicere aedes,

tollere iam sursum est lumina sola satis,

sed iuga nos miseros Reginhardus scandere cogit,

quae tua candida habent templa, Minerua sagax.

Inter marmoreas nos uult errare columnas

et lustrare iubet fana dicata deis.

Cum nobis dederint primam propylaea salutem.

ingredimur collem planitiemque sacram.

Praeterito ante deae, cui non est ala, sacello

nunc, quae tempus edax liquerit, ecce patent.

Huic ab Erichthonio est nomen – quis nesciat? – aedi,

plura ubi sunt Graecis numina culta piis.

Vixit in hoc templo serpens longaeua Mineruae.

Hic tua, rex, etiam busta fuere, Cecrops.

Donum Neptuni, salsas fons edidit undas

et donum melius, creuit oliua deae.

Sex a uirginibus sustenta est porticus olim,

quarum Londinii est sedibus una procul.

In medio stat adhuc delubrum Palladis altum

colle manetque ingens magnificae artis opus.

Cui licet omne decus desit nec signa deorum

sint, quis non stupeat moenia mira uidens?

Cum sint multa solo saeclis aequata peractis

et ui iam ruerint stultitiaque domus,

cogitat hic animo, qui rudera saxaque caesa

mirans conspiciat, magna fuisse tamen.

Cum conspecta mihi sint tot monumenta, relinquo

Acropolim et repeto, quae sita sint sub ea,

dumque iuuat collem magnae meminisse Mineruae,

orta suos calices poscit in ore sitis.

[Zythophilus]

Nunc in floriferis laetus uagor Helladis oris,

nunc tibi dicenda est, Cecropia alta, salus.

Nunc suis, ut mos est, delector carne minuta,

nunc Cereris spumans Graecus in ore liquor.

[Zythophilus]

Rex, regnasse, Cecrops, te fabula narrat Athenis.

Ecce,tua in media Cecropia urbe uia est.

[medicus]

Salve Zythophile, invenistine et arbores Cecropias in Attica vagans?
https://de.wikipedia.org/wiki/Ameisenb%C3%A4ume

[Zythophilus]

Non memini.

[Zythophilus]

Artis plena mihi cum sit modo licta Mineruae,

urbs, moror Olmucii, qui locus ora iuuat.

Caseus hic foetens editur, sunt assa anatesque;

squamigeri - num spes est mihi inanis? - erunt.

Quo sitis hic poterit mihi saeua liquore fugari?

Heus, latices Cereris legimus esse bonos.

[Zythophilus]

Hic positis patruus sceptris dat regna nepoti,

ut rem restituat regna premente malo,

namque erat eiectus populi flagrante tumultu

Caesar et eius erat uulgus in urbe furens.

[Exinterator]

quod inscriptionem ex transverso photographasti vix quicquam legi potest, Zythophile mi

[consus]

EXINTERATORI sal.
Haec in rete investigavi inscriptionis verba:

In abdicationis qua Ferdinandus Imperator clementissimus turbinum politicorum abissum obstructurus hisce in aedibus Austriaci imperii sceptra veneranda in nepotis augustissimi Francisci Josephi I., vacillantia Austriae regnorum fundamenta Viribus Vnitis stabilituri manus immisit piam ac perennem memoriam poni fecit Maximilianus Josephus Princeps Archiepiscopus Olomucensis. IV. ante Nonas Decembris 1848.

[Exinterator]

EXINTERATORI sal.
Haec in rete investigavi inscriptionis verba:

In abdicationis qua Ferdinandus Imperator clementissimus turbinum politicorum abissum obstructurus hisce in aedibus Austriaci imperii sceptra veneranda in nepotis augustissimi Francisci Josephi I., vacillantia Austriae regnorum fundamenta Viribus Vnitis stabilituri manus immisit piam ac perennem memoriam poni fecit Maximilianus Josephus Princeps Archiepiscopus Olomucensis. IV. ante Nonas Decembris 1848.

gratias habeo tibi, Conse