Nugae

[Zythophilus]

Illam imaginem a me factam non esse scitote. Cum Olmucii essem, palatium archiepiscopale intrare non licuit.

[Exinterator]

Narratur multos abhinc annos quoddam monasterium apud montem Subasium fuisse situm. Eius loci accolas ita pios fuisse ut in singulis diebus festis processiones faciendas curarent. Quapropter illos a monachis monasterii novenas ac vigilias precum ante processiones fieri solitas saepius petiisse. Monachos tamen negasse se id facturos nec morem petentibus gessisse. Non multo post febri quadam correptos omnes monachos, quotquot eo in monasterio degebant, mortuos esse. Monasterium quoque solo corruisse. Nec multo tempore post, eos qui in vicinia habitabant, ex longinquo cernere noctu figuras alia post aliam procedentium more incedentes et faculas ardentes prae se gestantes sibi esse visos. Nonnullos dicere illas esse monachos ob impietatem suam ea poena affectos ut perpetuo post mortem processiones facerent.

[Zythophilus]

Olmucium petitur, petitur ceruisia nobis.

Appropero. Caupo, dolia magna para!

Nos haurire iuuat uetera inter tecta liquores,

qua tribus atque uni sacra columna sita est.

[Zythophilus]

De caelo tenebris cum lapsis sidera lucent,

exopto, ut liceat nunc requiete frui.

[Zythophilus]

Graecia quae misit, nobis farcimina eduntur.

Iam memoras similes carmine, Homere, cibos.

[marcus03]

Iam memoras similes carmine, Homere, cibos.

Nimis salubriter Homerus quoque vixisse non videtur. Nullus cibus nisi McDonaldianus mortem praematuram citius afferre potest, si iterum iterumque comeditur.

[Zythophilus]

Sanctus Patricius iubet liquores
nos potare nigros. Et obsequamur
huic fidi calicesque compleamus,
ne nos hinc miseros fuget seuerus,
serpentes ut ab insula fugauit.

[Zythophilus]

Subrepens oculos somnus uult claudere fessos

meque iubet lecto tradere membra sopor.

Hinc abeo totum tenebris uelantibus orbem,

dum lux me rediens mane redire sinet.

[Zythophilus]

In Lycia comis si rustica turba fuisset

et pia, non coleret uiuida rana lacus.

Non fuit, et tibi agit, Latona, ciconia grates,

quod tribuit gratos iusta tua ira cibos.

[marcus03]

Non fuit, et tibi agit, Latona, ciconia grates,
quod tribuit gratos iusta tua ira cibos.

Praeclarissime!

An ciconia ranis crura evellit assandi causa? Fortasse ranarum crura assata sola diligit.

https://www.google.de/search?q=Storch+f ... v16msBnK_M:

[Zythophilus]

Non assat ranis euulsa ciconia crura,

quod coquere huic uolucri non licet igne cibos.

[Zythophilus]

Posse parare dapes credo sibi Phoenica flammis,

sed tamen – heu! – corpus malle cremare suum.

[Zythophilus]

Nunc assanda tibi est, o Marce, ciconia flammis!

An capere hanc celerem non potes, ut fit, auem?

[marcus03]

Nunc assanda tibi est, o Marce, ciconia flammis!

Tua carmina legens summaque admiratione commotus saepe illam vocem exclamo: "Da brat’ mir einer einen Storch!"( "Quisquam mihi ciconiam asset!)
Ut videre potes: Ipse assare non soleo, sed alios assare potius iubeo. Adhuc quidem nullum inveni, qui mihi assaret. Utinam mox peritum ciconias assandi inveniam! Spes moritur ultima et quaedam ciconia olim cum illa.

[Zythophilus]

Accusas alios uolucres tibi et assa negantes,

a te cum celeres non capiantur aues.