aenigmata

[Pyrrha]

Cum modo in mentem mihi veniat, aliud vobis aenigma heraldicum vobis praebeo:
Sunt in Germania regio et regionis caput, quorum insignia praeter colores fere eadem sunt.

a) Quae regio? Quid regionis caput?
b) Quid depictum est? Quibus coloribus in regionis insigni? Quibus in urbis?

[consus]

Eugepae, optima Pyrrha, aenigma lepidissimum! Nonne insignia Saxoniae Inferioris et Stutgardiae ante oculos tibi obversantur? (Mirum, ut opinor, non est .)
Ecce insignia Saxoniae Inferioris: equus argenteus in scuto rubro exsultans:
http://www.e-politik.de/blog/uploads/wappen_niedersachsen.jpg
et insignia Stutgardiae sive Equariae, capitis Badae Wurtembergaeque: equa nigra in scuto aureo exsultans:
http://www.znerollerb.de/video/stuttgart_wappen.gif

[Pyrrha]

Iam credebam, optime Conse, hoc aenigma abs te potissimum solutum iri. Nimirum de Saxonia Inferiore et de Stutgardia loquor.

[consus]

Terribiles spectant tabulas nunc fluminis undae,

Quas vir et arte valens pinxit et ingenio.

Personas, larvas, mortem dilexit amaram:

Quin etiam expressit corporis ossa sui.

Quis? Quid? Ubi? Eqs.

[Apollonios]

puto te, amice artium, Iacobi Ensoris picturas in Wuppertalis museo demonstrare.

http://www.ensor-ausstellung.de/

[consus]

Recte putasti, amica artis pingendi peritissima!

Quin etiam expressit corporis ossa sui

Quem pentametrum cum scriberem, hanc ante oculos habebam imagunculam: http://farm3.static.flickr.com/2106/1805458482_4a29489e69_o.jpg
Iacobus Ensor pictor mortisque contemptor (1860-1949) corporis sui statum qualem anno 1960 fore putaret anno 1888, cum duodetriginta annos natus esset, non infacete videtur adumbrasse.

[consus]

Est domus insignis, decorat fastigia summa

nobilis auratis sphaera nitens foliis.

***
Quod aedificium?

[Tiberis]

Tiberis Conso suo s.d.p.

nonne domus a Iosepho Maria Olbrich saeculo XIX. exeunte exstructa ante oculos tibi versatur, in quam Gustavus Klimt, Iosephus Hoffmann aliique eius aetatis artifices secesserunt? a qua secessione domum ipsam nomen accepisse constat. id aedificium , in cuius fronte haec verba leguntur:
SUAM AETATI ARTEM, SUAM ARTI LIBERTATEM, nostris temporibus etiam in nummulis L centesimorum conspicitur.

vale!

[Zythophilus]

Vulgo caulis nominatur.

[consus]

Recte iudicastis, amici carissimi. Equidem caulem illum vehementer admiror gaudeoque nummum Austriacum tam insigni aedificio Vindobonensi ornatum esse. Considerate modo http://www.euxus.eu/wien/a800/56120024-secession-wien.jpg
et
http://magazine.web.de/images/952/590952,h=400,pd=2,w=400.jpg

[Tiberis]

salvete, amici !

in titulo sepulcrali de modulatore quodam celeberrimo - plurimis verbis scilicet omissis - haec legimus:
(...)
SUBLIMIA MODULATUS MELE
IMMORTALEM SIBI GLORIAM PARAVIT
FUGANDI CURAS ARTIFEX ET MULCENDI PECTORA
(...)
MAECENATIS SUI STUDIO
(...)
HOC CONDITUR TUMULO
NON MORIAR SED VIVAM
ET NARRABO OPERA DOMINI

quis "hoc conditur tumulo" ?
cuius "Maecenatis studio" ?
quo loco?

[consus]

Prorsus ego, titulo lateat quis, nescio, tanto.

Pro dolor! Has tenebras pellere quis poterit?

[Tiberis]

ne tu deficias animo ! modulator in illo

quis fuerit titulo , perfacile invenies.

ultima praecipue tituli bene respice verba;

rem si deliberas, solvere cuncta potes.

[consus]

Consus Tiberi amico suo humanissimo s.p.d.
Aenigmate tuo perlecto cum verba Ps. 118, 17 (Vulg.) cognossem, in mentem mihi quidem venit Orlandi Lassi, sed cum titulus sepulcralis plane mihi ignotus sit, artificis illius nomen proponere non audeo. Meliore opus est cogitatione...
Bonam noctem!

[consus]

Consus Tiberi suo s.d.p.
O di immortales! Equidem si tanta mihi artis musicae esset scientia, quanta nemo dubitat quin tu, mi optime amice, emineas, facile me aenigmatis solutionem inventurum fuisse puto. Tamen quadam me suspicione attingi fateor. Cum enim gugulando Orlandi Lassi sepulcrum titulo Theodisce composito ornatum esse investigarim, nomen nunc tibi proponere ausim Ioannis Petri Ludovici Palaestrinae, quem musicae principem summa apud Iulium p.p. III gratia floruisse constat. Sit tibi semper bene!