aenigmata

[Medicus domesticus]

@romane:
Bellis perennis est flos magnificus hieme interdum florens:
Sub exemplo:
http://www.janko.at/Garten/2008/Fotos20 ... _weiss.htm

[Sokrates Palaios]

Euge, Medice domestice!
Bene confirmas meam naturae observationem.
Gratias tibi.

[consus]

Salve, mi spectatissime Socrates, salvete, amici pariter omnes.
De magna bellidis perennis utilitate monitus hoc me iure iurando obligo:

Perpetuo Bellis mihi floreat illa Perennis,

Quam prius immites subsecuere manus.

[Zythophilus]

Proelia commisi; mea membra caballus aenus

nunc habet in platea, quae mihi dedita erat.

Caeca meae statuae mirantur lumina signum

militis elatum; parma polita micat.

Aurata galea statua est imposta columnae

et uexilla micant aurea tenta manu.

Porticibus curuis scripta est uictoria magna

lataque libertas – littera multa tacet.

[consus]

Aenigmate tuo lecto, mi Zythophile, nescio qua de causa mente animoque, infinita scilicet dubitatione distractus, in caput revertor Hungariae: media in urbe ingens Heroum patet Forum (Hungarice HÅ‘sök tér), quod columna duplicique porticu leniter curvata ornatum est.
Felicissimas tibi precor Kalendas Maias.

[Zythophilus]

SALVE
Illo de monumento locutus non sum, sed aliquid mutandum esse intellego, ne falsa canam. Ignosce.
Proelia commisi; mea membra caballus aenus

nunc habet in platea, quae mihi dedita erat.

Caeca meam statuam mirantur lumina signi

militis elati; parma polita micat.

Aurata galea statua est imposta columnae

et uexilla micant aurea tenta manu.

Porticibus curuis scripta est uictoria magna

lataque libertas – littera multa tacet.

Addendum puto, ut facilius fiat aenigma:
Alterius miles monumenti est post mea facti

signa; diu fuerant iam fora dicta mihi.

Interdum saliens mirantes impedit unda

eripiturque oculis illius ara uiri.

VALE

[Tiberis]

Tiberis Zythophilo sal.

platea quaedam Vindobonensis appellata est a principe Carolo Philippo de Schwarzenberg, qui ex pugna apud Lipsiam commissa victor exierat cuique ob eam rem statua equestris exstructa est. "alter miles" , de quo mentionem fecisti, pertinet ad monumentum "exercitus rubri", id est Sovietici, quod post bellum mundanum secundum Russi fieri iusserunt.

vale !

[Zythophilus]

Quid addam, optime Tiberis! Res per te nunc patet.

[Tiberis]

ignoscite mihi nimis diu a scribendo retardato , amici !
ecce novum aenigma:

quaeritur scriptor quidam saeculi XX. ineuntis (sive saec.XIX.exeuntis)..

Austria me genuit, Veneti rapuere. libellis

neglectis paene scribere desieram.

ne id facerem, me est hortatus , qui scripsit Ulixem.

laudabatur ab hoc Aemilianus amor.

notus posteritati non sum nomine vero:

namque ab origine ego nomen utraque traho.

qui scriptor ?
nomen eius verum ?
"Aemilianus amor" : quod opus ?
nomen eius, "qui scripsit Ulixem" ?

valete!

[consus]

Consus Tiberi amico suo illustrissimo s. d. p.

Iterum aenigma iucundissimum! Neque tamen temporis causa versus mihi facere licet, quod vehementer doleo.

qui scriptor ? Italus Suebus < Italo Svevo
nomen eius verum ? Hector Faber < Ettore Schmitz
"Aemilianus amor" : quod opus ? Aetas senilis < Senilità
nomen eius, "qui scripsit Ulixem" ? < Iacobus Gaudens < James Joyce

Bene et feliciter vale.

[Tiberis]

Tiberis Conso amico suo eruditissimo s.d.p.

iterum perfectissime omnia solvisti. de qua re ex animo tibi gratulor !
o me Sphingem mitem nimis atque innocentem, cui quaestiones sagacitati tuae pares iam deficiant !

optime vale !

[consus]

Salvete, amici carissimi.

Ecce novum aenigma, quo proposito diem Solis paullulum iucundiorem vobis fore spero.

Haud procul a Rheno castellum cernis amoenum.

Turribus instructum fossa coronat opus.

Quo loco duo aliquando homines nobilissimi inter se convenerunt. Alter alteri fabulam legit scaenicam, quae saeculo undevicesimo ineunte a poeta optimo maximo etiam Theodisce reddita est.

Quod castellum?
Qui homines?
Quae fabula scaenica?
Qui poeta fabulam convertit?

[Tiberis]

o rem obscuram ! quam cum iterum atque iterum frustra cogitaverim , affirmare equidem non ausim ea re diem Solis iucundiorem mihi fuisse...
quamquam hastam nondum abicere volo, gratum tamen erit, si tu, o Sphinx immitis, aliquantulum auxilii nobis praebebis.

[consus]

Libentissimo animo, mi Tiberis, …



Alter erat scriptor, princeps clarissimus alter.

Lingua viris placuit Gallica blanda procax.

[Apollonios]

plane nescio an nugae sint quae propono vel propinqua veritate...

Schönburg?
Fridericus et Voltarius?
Tancred?
Goethe