aenigmata

[Princeps]

Salve, Conse clementissime!

Nova temptanda via est. Verba tua 'Serica terra' et septem formis variis compositus' legens omnem fere orbem terrarum oculis animoque perlustravi. Id unum inveni: est lacus, qui Balchasch dicitur. Septem flumina ibi per loca deserta fluunt, quam ob rem nos eam regionem appellamus 'Siebenstromland'.

Vale!

[consus]

Consus Principi amico suo doctissimo s. d. p.
Denuo in errore te versante animus meus gravissimi doloris concidit ictu ; neque enim ad geographiam pertinet res illa, quam ex septem formis variis compositam esse scripsi, sed ad geometriam vel potius planimetriam. Non est lacus, sed ludus subtilis a Seribus inventus. Quo homines eruditi, si quid habent temporis vacui, mirum in modum oblectantur. Cura ut valeas.

[Princeps]

Princeps Sphingi clementissimo s.p.d.

Heu me stultissimum potorem aquae - praestat me in septem flumina atque Nilum praecipitare. Redeundum mihi puto esse ad vinosum Homerum et Ennium nostrum, de quo Horatius bene in epistulis (I,19,7sq.) - licet verba paululum mutem:

Princeps ipse pater numquam nisi potus ad aenigmata
prosiluit solvenda ...

Ludum multiplicem a Seris inventum puto similem esse Loculo Archimedio. Septem formae geometricae variis modis componendae sunt.

Plurimo auxilio mihi opus erat - reliquum est, ut nomen ludi, quem quaesivisti, dicam:
TANGRAM

Cura, ut valeas!

[consus]

Macte virtute, mi Princeps! Celeberrima illa Tabula Septem Sapientium ab Italis appellatur rompicapo: Nonne saepe, cum figuras componamus, capita nostra rumpi videntur?

[Princeps]

Salvete, amici doctissimi et Latinae aliarumque linguarum peritissimi!

Novum aenigma mihi proponendum est.

Duo sunt viri, quos, ut rem faciam perspicuam, litteris A et B notabo.

A) Praenomen alterius est notum, ignotum cognomen.
B) Cognomen alterius est notum, ignotum praenomen.

A) Alter primas partes agit in fabula Romanensi,
B) alter multis in narrationibus.

A) Alter nihil mali fecit,
B) alter prudenter loquitur.

Quorum cognomina non perscribuntur,
A) tantum prima littera cognomen alterius semper,
B) alterius saepe notatur.

Quaero, amici, et praenomen alterius (A) et cognomen alterius (B).

Valete!

[Tiberis]

salve , Princeps!

nonne recte suspicor virum A esse Iosephum K., qui primas partes agit in praeclarissima Kafkae fabula, quae inscribitur "iudicium (der prozess)" ? Ille enim, quamquam innocentem se putat, quia nihil mali fecerit, tamen ab iudicibus quasi arcanis in ius vocatur...
cognomen viri B - pro dolor - adhuc non inveni. quem virum in reliquis Kafkae fabellis inveniri mihi probabile non videtur, nisi vehementer erro. ergo in operibus aliorum scriptorum erit quaerendum...
tamen hastam nondum abicio.

[Princeps]

Princeps Tiberi litterarum peritissimo s.d.p.

Recte, optime Tiberis, suspicaris praenomen quaesitum esse Iosephum. In operibus Kafkae inveniri non potest alterius viri cognomen, quod eadem littera K. incipit.

Cura, ut valeas!

[consus]

Aquarum caelestium spuma* feliciter superata, mi Princeps, integer domum reverti.........
Ut paucis dicam (pace scilicet tua, mi Tiberis): alterum virum, id est B, puto esse Brechtianum illum Keuner.
Bonam noctem.


---------------------
* Plin. nat. 17, 14.

[Tiberis]

utinam paulo post domum revertisses, mi Conse! nam ego quoque interim - assidue gugulando -Bertoldi Brecht fabellas de domino K. (Keuner) inveni.
sero venientibus ossa..

[Princeps]

Salvete, amici doctissimi!

Viribus ingeniisque coniunctis aenigma solvistis, Tiberis primam partem et tu, Conse, secundam. Ergo ignoratur, cui vestrum novum aenigma nunc sit proponendum. Tiberis ( ) magno cum dolore videtur existimare tuam rem, Conse, agi.

Novum aenigma suspenso animo exspectamus.

Curate, ut valeatis!

[consus]

Consus Principi et Tiberi amicis suis doctissimis s. d. p.
Equidem investigationis palmam dandam censeo esse Tiberi nostro. K enim littera abs te, mi Princeps, benevole proposita aenigmatis pars altera multo facilius poterat solvi. Agedum, mi Tiberis!

[Tiberis]

gratias maximas tibi ago, mi Conse, quod ius aenigmatis ponendi mihi immerito benevole concessisti!


liber, quem oro vos investigetis, est de viro quodam scriptoris familiarissimo, qui in valetudinario versatur, in quo mente capti continentur; patruus autem eius fuit philosophus celeberrimus...

titulus libri ?
nomen scriptoris ?
nomen philosophi ?

valete !

[consus]

Salve, mi optime Tiberis.
Ingeniose excogitatum - - -
Equidem librum puto inscribi Wittgensteins Neffe.
Nonne scriptor est Thomas Bernhard et philosophus Ludovicus Wittgenstein, qui celeberrimum composuit illum Tractatum logico-philosophicum?

[Tiberis]

o Conse, Conse, quis te omni doctrina ornatum exaequabit ? heu me Sphingem miseram et iam pridem de scopulo praecipitaturam, si modo scopulum aptum invenero !
quamquam haec interrogata tibi non difficilia fuisse puto , quia Bernhardum prae ceteris mihi dilectum esse te non praeteriisse suspicor , tibi de hoc quoque aenigmate incredibili celeritate soluto ex animo gratulor!

optime vale!

[consus]

Salvete, amici carissimi.
Ecce nova verba ambigue posita:

Res quaedam pretiosissima multis distincta est gemmis. Cui toti rei a poeta in quodam carmine nomen inditum est e vocabulo* unius gemmae, quam inter alias mirabiliter excellere viderat.

a) Qua de re agitur?
b) Quod nomen erat gemmae?
c) Qui poeta gemmae nomine usus est? Quo in carmine?
d) Ubinam gentium illa res diligentissime asservatur?


--------------------------
* Tac. ann. 12, 27.