aenigmata

[mystica]

.

[consus]

Equidem, o Mystica, ante oculos tibi puto obversari Gislebertum Crispinum, qui Disputationem Christiani cum gentili de fide Christi composuit.

[mystica]

.

[consus]

Amicis suis excellentissimis sal.

In praeclara fabula quae vocatur Romanensi, quae saec. XIX composita est, primas agit partes vir, cuius tria nomina (praenomen, nomen patris, nomen gentile) initium faciunt a P littera.

Quae fabula? Quis eam composuit?

[Tiberis]

Tiberis Conso, amico suo litteratissimo, sal.

nonne eiusmodi nomen triplex praecipue apud Russos invenitur, quorum littera P, a qua nomina viri quaesiti incipiunt, in alphabeto Latino "R" scribitur? qua de causa suspicor tibi Rodion Romanowitsch Raskolnikow obversari, qui in fabula notissima Theodori Michaelis f. Dostojewski, quae "crimen et poena" inscribitur, primas partes agit.

[consus]

Gratulor: Est, Tiberis, Родион*: aenigma solutumst!

Te nunc ordo vocat: Sphinx peracuta, veni!

_________________
* Graece: Ῥοδίων.

[Tiberis]

ecce novum:

Fictum quaerite nunc virum, sodales!
Qui, cum prospicit ex sua fenestra,
mentem ut officio levet molesto,
turrim aquatam ibi conspicit vetustam.

quis?

[consus]

Cum versus tuos, mi Tiberis, legerem, statim nescio quomodo in mentem mihi venit vetusta aedis sacrae St. Catharinae turris, quae medio conspicitur in lacu artificiali qui Reschensee appellatur. De quo lacu Marci Balzani (Marco Balzano) scriptoris Itali liber est qui inscribitur Resto qui (i. e. Hic maneo / Ich bleibe hier). Doleo quod nondum eum legi, sed rete pervagatus, quantum hac hora assequor coniectura, illum virum abs te quaesitum puto esse Ericum Hauser agricolam.

[Tiberis]

Non turrim aquis quasi submersam dicere volui, mi amice, sed aquam continentem. eheu! nimis ambiguo verbo (scil. aquata) me usum esse apparet, quod te oro ignoscas.
Librum illum Balzani adhuc non novi. sed dubito, num Ericus Hauser prospexerit ex sua fenestra,
mentem ut officio levaret molesto(!).
quamobrem doleo te in errore versari.
ceterum vir quaesitus multo illustrior est quam agricola ille Tyroliensis...

[Willimox]

Potestne ille vir in Venetia inveniri, doctissime Tiberis?
Maximum mihi dubium.

[mystica]

.

[Tiberis]

ad Thrasybulum:

ne tu quaesieris virum et aquatam
turrim apud Venetos. sed oppido illa,
quae quaero, inveniuntur in remoto.

[Tiberis]

ad Mysticam:

etiam tu erras, optima Mystica. nullum quaero phararium. num pharus aquam continet?
sed, ut aliquantillum auxilii vobis praebeatur, hoc unum addere volo: scriptor illo viro ficto, qui in multis fabulis primas agit partes, immortalem sibi gloriam adeptus est.

[consus]

Hm... Clementer abs te adiutus, mi Tiberis, cogitare te arbitror de Kurt Wallander commissario, qui in libris quos Henning Mankell scriptor Suecus composuit primas agit partes. Cf.https://www.onetz.de/deutschland-welt/classic-267231-id1329729.html

[Tiberis]

ita est, mi sagacissime amice. gratulor! et maximas tibi ago gratias pro imagine allata: nam turrim illam aquatam nondum vidi.