Salvete, investigatores aenigmatum indagatricesque!
'Ibimus ... Britannos', ut Vergilius noster (ecl. I,64sqq.) cecinit. Novum vobis proponam aenigma:
Saeculo XIX ineunte is, quem quaero, in insula quadam in mari Atlantico sita natus est. Nave venit in Britanniam, ubi adulescentem quendam aliquando poetam praeclarum futurum cognovit et intellexit. Ambo artissimo amicitiae vinculo mox erant coniuncti: alter in alterius fide permanebat.
Paucis annis post fortuna saevire coepit - advena e vita decessit. Cuius amicus arte poetica vehementer occupatus mortuum ita lugebat, ut eximium monumentum iuberet in nemore manu consito poni. Quo in monumento naturam moresque amici mortui summis laudibus extulit.
Hic tres suboriuntur quaestiones facile solvendae:
a) Quis fuit mortuus, b) quis poeta, c) ubi monumentum?
Valete!