aenigmata

[consus]

Est locus in terris, nos qui terroribus opplet:
Arci consimilis, sine tectis, undique muri
Circuitu tacito protectus non ita celsi.
Alitibus tribuit speculas saevis avidisque.
Quid faciant volucres, fortasse requiris, amice:
Dilacerare volunt pulpantes viscera cassa
Lumine vitali: satiant penetralia castri
Obscenis dapibus praedonum rostra redunca.



Quis locus, amici?

Timeo ne horrore perfundamini.

[Zythophilus]

Sancta quibus dederat Medorum iussa magister,

mortua sub caelo ponere membra solent.

Turribus in celsis decarpit corpora uultur,

et turres tacitas gens uocat illa suas.

[consus]

Caucasias scribis volucres decerpere membra
Rostris robustis hominis quem mors abolevit.
Medorum mos est, sed et India talia monstrat.

[Zythophilus]

Media quos genuit, colitur tosta India ab isdem,

uerum uulturibus nunc pia secta caret.

https://derstandard.at/1353208263547/Ge ... als-werden

[Zythophilus]

Est specubus similis sub humo caupona sinistra:

Arma tenent muri bellaque saeua putas.

En, semel auditur sonitus uel clamor in hora.

Dicitur occidi Russus homo sub humo.

Est iocus; intus enim uir non occiditur ullus,

sed non ficta tamen bella taberna refert.

[Christophorus]

Aenigma Consi iam solutumst novumque a Zythophilo positum?

[consus]

Est specubus similis sub humo caupona sinistra...

CHRISTOPHORO sal.

Zythi potator versibus pulchris suis
Aenigma praebens cruciat nos crudeliter.

[Zythophilus]

Quia uix ad interrete mihi accessus Posnaniae est, nefas uos ita torquere puto. Caupona Leopoli sita Krijivka uocatur.

[consus]

Consus Zythophilo s. d. p.
Nuntio tuo lecto aenigma puto feliciter iam esse solutum abs temet ipso: Videtur esse caupona subterranea Leopolitana supellectili militari ornata.
Nonne etiam tibimet ipsi novum nunc est proponendum aenigma?

[Tiberis]

Zythum qui amas, ubi es? nimis diu cessas!
oportet exspectantibus novum ponas
aenigma . nunc cervisiam tuam ut mittas
flavam, peto, totumque te huic rei dedas.

[ille ego qui]

nisi fallor, nunc ipsum Posnaniae profitetur cum artem versuum pangendorum - idque Latine - tum cervisiae hauriendae!

[Zythophilus]

Posnania reuertit hoc die uates
domique iam suo facit modo uersus.

[Christophorus]

[Zythophilus]

Vindobonae platea est, Romae quam credere possis.

Hic Mariam uersus laudat in aede sacra.

Quam plateam quaero? Quaesitum dicite uersum!

Quod templum teneat, dicite, uerba, mihi!

[consus]

Ex Norvegia feliciter domum reversus hoc modo ad interrogata tibi, o Zythophile, velim respondere:
Quod templum teneat, …] Ecclesia Societatis Jesu (vulgo Jesuitenkirche)
Quam plateam quaero?] Dr.-Ignaz-Seipel-Platz, in regione I.
Quaesitum dicite uersum!] ASSVMPTA EST MARIA GAVDENT ANGELI. Qui versus quasi titulus est tabulae pictae qua altare maius decoratum est.
Utinam ne falsa ducar opinione!