aenigmata

[Zythophilus]

Haec platea est similis, tamen altera quaeritur a me:

Frons habet hexametrum, uerba dicata piae.

Cum finitus erit Sextilis mensis, aperta

multos discipulos mox schola adire uolet.

[consus]

ZYTHOPHILO sal.
Clementer et eleganter abs te adiutus repperi Ecclesiam Mariae Fidelis exstructam in regione octava (Jodok-Fink-Platz). Cuius frons summa hoc ornata est hexametro:

VIRGO FIDELIS AVE

COELESTIS MATER AMORIS
A. d. III Non. Sept.: Sit tibi scholae initium satis bonum faustum felix fortunatumque!
Vale.

[Zythophilus]

Gratulor: Haec platea est, Mariae sunt templa fidelis,

sunt laudantia eam uerba reperta tibi.

Platea, quae Iodoco Fink dicata est, uulgo interdum „Piaristenplatz“ (platea Piaristarum) uocatur, quia ibi sedes Ordinis Clericorum Regularium Pauperum Matris Dei Scholarum Piarum sita est.
Gratias ago pro precibus tuis.

[consus]

Amicis suis illustrissimis sal.

Qui rate velivola suevit percurrere pontum,

Is varios nodos nectere nauta solet.

Eminet inter eos validus quo navita puppem

Alligat ad palos in statione sitos.

Nodus is est constans: laqueum non contrahit umquam.

Nunc oculum Italicum nomen amantis habet.

Quem nodum quaero? Theodiscum dic mihi nomen!

Versu uno verbum condidi: quaere modo!

[Christophorus]

Estne verbum Italicum id nomen, quo plurimi nautae utuntur? An solum Italici?

[consus]

Est vocabulum linguae Germaniae septemtrionalis qua accolae maris Germanici utuntur. In usu est etiam apud Batavos. Latet in quodam carminis versu. (Nautae Itali sua ipsorum lingua illum nodum utilissimum longe alio appellant nomine.)

[medicus]

Salve conse, e septentrionalibus reversus!
Estne nomen Germanicum Palstek, quod latet in illo versu:
Alligat ad palos in statione sitos
An erro?

[consus]

Gratulor, amice! Non erras. Est nodus qui Palstek (< Pfahlstich, mhd. stich = nodus, quo navis ad palum alligatur; Bat. paalsteek; Ital. gassa d'amante) appellatur.

[medicus]

Salvete amici, nunc vobis aenigma novum propono:
Ubi statua inveniri potest, quae ex nihilo nisi animalibus constat?
Quae sunt haec animalia?

[Christophorus]

Certe non responsum quaesitum est, sed statua musicorum Bremae ex animalibus constat:

Asinus, canis, feles, gallus ...

[medicus]

Gratulor, invenisti statuam et animalia Bremae, Christophore!

[Christophorus]

Nunc novum:

Quaeruntur vir et femina, qui in eadem terra eodemque pago nati in eadem alia terra eodem summo officio fungebantur. Vir antecessit feminam, quae tribus modo annis minor natu erat.

[consus]

Abdita misisti nobis, Sphinx mystica, verba:

Orbos auxilio nos reticere vides.

[Christophorus]

Praeterito tempore non erant tot homines politici, qui et in aliena terra (et tamen - mirabile auditu - tandemque in patria iam diu desiderata) et feminini generis eam rem publicam administrarent.

[marcus03]

Illa femina erat Golda Meir, illi viro nomen erat Levi Eschkol.