aenigmata

[Zythophilus]

Nominis haec forma est, sed non quaesiuimus istud.

Scripsi in carminibus dicta uehicla cani.

[Tiberis]

est cantor Americanus (Tom Waits), cuius ex carminibus unum inscriptum est "Ol'* 55" : hocne tibi ante oculos versatur?

* Oldsmobile

[Zythophilus]

Accedis propius, iam raeda est paene reperta.

Huic etiam Austriacus dat noua uerba canens.

[Tiberis]

Ecce alterum inveni, quod Curtius Resetarits (vulgo Kurt Ostbahn) cecinit: Chevy '57

[Zythophilus]

Optime! Paulum ante Curtii uersionem originalem cantor Americanus similem edidit modum.
https://www.youtube.com/watch?v=oBIfORN9b2M

[consus]

Carmine raucisono neglecto me gravis error

Abstulit a vero: nunc subit ora pudor.

Es palma, Tiberis, dignus victoris honesta:

Artibus instructum te latet hercle nihil.

[Zythophilus]

Discimus, omnia paene docent, ludum quoque adesse,

flectere cum mentem cogat et ire, reor.

Sint leuiora licet, leuioraque nosse iuuat nos

nec nescire uiros – sunt leuiora – pudet.

[Tiberis]

Iuvat commorari in raedis investigandis...

Ecce:

Raedas quaere duas, quarum dat nomen utrique

transitus Alpinus. nomina pande mihi!

nomen utriusque transitus?
quae societas autoraedaria?

[consus]

TIBERI autocinetorum amatori peritissimo s. d. p. C.
Nescio an ante oculos tibi obversetur ille transitus Alpinus qui Galibier appellatur. Duae sunt raedae quae ex illo transitu nomina acceperunt: Bugatti 57C et Bugatti 16C: elegantissima hercle vehicula!

[Tiberis]

Tiberis Conso suo s.p.d.

Me neglegentem, qui dicere oblitus sim autocineta vetera (!) quaerenda esse. e quibus unum quidem (scil. Bugatti 57c) indagasti, quod a transitu Galibier nomen cepit: gratulor! tamen restat, ut alterum quoque invenias; quod quin tibi sine ullo labore contingat, non dubito.
(scripsi enim: nomen utriusque transitus)

[consus]

... nomen utriusque transitus

Legi quidem, mi amice, sed neglexi pressus quadam in aenigmate solvendo celeritate...
Redeo ad rem: Forsitan cogites etiam de autocineto Austriaco cui nomen est Steyr Klausen Sport. Nonne etiam Klausen nomen est transitus Alpini?

[Tiberis]

gratulor tibi, mi amice, de aenigmate soluto, licet ipse non de isto autocineto, cui nomen Steyr Klausen, cogitaverim. Sed non refert, quam raedam attuleris, dummodo ea a transitu Alpino nomen ceperit.

quae societas autoraedaria?

cuius societatis numerum si diligentius perpendisses, non dubito, quin statim in aedibus Bugattianis raedam a me quaesitam inventurus fueris
https://de.wikipedia.org/wiki/Bugatti_Type_57#Stelvio

[consus]

...cuius societatis numerum si diligentius perpendisses...

O di immortales! Vehementer doleo quod denuo parum diligenter verba tua legi. Quid mirum si nunc puniceus mihi sedet in ore pudor... Tamen addere velim me quoque cogitasse de illo transitu Alpino qui Stilvius appellatur (passo dello Stelvio), sed nomen putabam non esse coniungendum nisi cum autocineto nostra aetate facto: Alfa Romeo Stelvio.

[consus]

Amicis suis spectatissimis sal.

"Vitale lumen hausi primum in insula
Ierne quondam cui mirum nomen datum est.
Pietatis plenus perlustravi torridos
Iudaeae campos atque urbem Davidicam.
Redeuntem e Terra Sancta me Saturnia
complexa est tellus et marina civitas
Cleri me fecit rectorem data infula.
E vita cum migrassem, cives me probi
Sanctum vocarunt. Aedes struxerunt sacras
Ut exornarer sempiterna gloria.
Est urbs quae distat illa ab urbe milia
Ter centum ferme. Mirum ibi templum vides
Mihi dicatum cuius in forma stupes:
Tribus cylindris ornatur tectum cubi,
Uterque quorum gestat hemisphaerium."

Quis loquitur? Quod templum?

[Tiberis]

Tiberis Conso amico suo s.d.p.

Graecium profecturus quam paucissimis, quod quaeris, absolvam:

quis loquitur: Sanctus Cataldus
cives probi : Tarentini
mirum templum: Panormi conspicitur