aenigmata

[ille ego qui]

... nunc timeo, ne me imperitissimum putes fabulae Wagnerianae...

Noli quaeso, optime Tiberis, putare me tam rudem tamque rigidum esse censorem - di melius! Nonne Viatorem imitatus es, qui cum „mi fili“ diceret imagine quadam et translatione usum videtur esse? Quamobrem non est causa cur „in cilicio et cinere“ incedas.

quam multa utiliaque a vobis in dies addisco, sodales! nonne ista est dicendi formula vere Christiana, quin ex ipsa Sacra Scriptura deprompta ("in Sack und Asche gehen")?


valete!

[consus]

... ex ipsa Sacra Scriptura deprompta ("in Sack und Asche gehen")?...

Cf. Mt 11, 21 et Jes 58, 5.

Venio ad aenigma quo soluto vos quoque gaudio perfundi posse spero:

In quodam huius anni libro legendo omne his diebus pono tempus, idque partim animo perturbatus, partim gaudio affectus. Primis enim paginis evolutis legi quid abhinc annos septuaginta septem in urbe celeberrima factum esset: Praefectus quidam Imperii quod vocatur Tertii fabricam adiit ut orationem apud operarios haberet. Qui quidem dissimulatione callida usi, priusquam ille os aperire potuisset, ab initio verbis „O nos felices! Feliciter, feliciter!“ victoriam conclamantes eximias laudes atque virtutes factionis eiusque adsectatorum fortiter sine ulla intermissione cecinerunt. Orator hora amplius tacens in rostris exspectavit dum animorum ardor defervesceret, sed frustra – nullo denique enuntiato verbo fabricam reliquit.



Quis liber?
Qua in urbe celeberrima? Qua in huius urbis regione?
Quis praefectus?

[Tiberis]

Tiberis Conso, amico suo spectatissimo,sal.

Nonne liber abs te quaesitus "liber caeruleus" appellatur ? quo in diario Ericus Kästner, cuius opera edi Nazistae vetuerunt, res memorabiles ab anno MCMXLI usque ad finem belli gestas memoriae tradidit.

qua in urbe? > Vindobonae, in vico Floridsdorf
praefectus "pagi" > Baldur von Schirach

[consus]

In totum, mi doctissime amice, aenigma solvisti. Gratulor. Hanc narratiunculam cum legerem, non mediocri admiratione affectus sum. Quam praestans fortitudinis exemplum prodiderunt illi operarii! Quam ingeniose, ut oratori eiusque gregalibus resisterent, eorum ipsorum arma ceperunt!

[Tiberis]

Ecce novum:

In carmine quodam maestissimo is, qui ad iter nocturnum profectus est, haec fere dicit (scilicet non iisdem usus verbis):




Floribus hic tectus niveis primum requievi.

solvitur infelix denique somnio amor.

quo in carmine?
a quo est compositum?

[consus]

TIBERI ingeniosissimae Sphingi Styriensi sal. pl. d.
Diu multumque versibus tuis vexatus primum putavi Francisci Schubert carmen quod inscribitur „Tilia arbor“ ante oculos tibi obversari; celeriter me errasse intellexi, sed illam arborem in animo habens recordatus sum quandam inter Schubert et Mahler similitudinem; qua adductus, quamvis magna etiamnunc dubitatione fatear me iactari, nunc dicere ausim cogitare te de Gustavi Mahler „Carminibus socii opificis iter facientis“ vel potius de quarto huius operis carmine, in quo haec scripta videmus verba (Ea verba quibus te in versibus scribendis usum esse arbitror colore illustravi):

Auf der Straße steht ein Lindenbaum,
Da hab' ich zum ersten Mal im Schlaf geruht!
Unter dem Lindenbaum,
Der hat seine Blüten über mich geschneit,
Da wusst' ich nicht, wie das Leben tut,
War alles, alles wieder gut!
Alles! Alles, Lieb und Leid
Und Welt und Traum!

Iucundissimum tibi exopto tempus paschatis.

[Tiberis]

Tiberis Conso rerum musicarum peritissimo s.p.d.

Non est, amice doctissime, cur de solutione tua dubites. nam omnia optime explicasti. Gratulor!
quod autem ad tiliam attinet, recte memorasti Mahlerum , cum hac uteretur imagine, Franciscum Schubert esse secutum: nonne illa arbor apud utrumque quasi signum somnii ac requietis esse videtur?

[consus]

Amicis suis spectatissimis pariter omnibus sal.
Saec. XIX in quadam regione Europaea edictum est ut suam quisque navem piscator suo ipsius vexillo in summo malo proposito insigniret. Hoc propterea praescriptum est, ne quis a nullo cognitus contra ius piscaretur. Vexillo enim singulari arte confecto cum alia multa tum imprimis monstrabatur quo loco navis stationem haberet.
Quo de vexillo hoc est aenigma?

[Christophorus]

Fortasse quaeris ea, quae vocantur "Kurenwimpel"?

https://de.wikipedia.org/wiki/Kurenwimpel#Geschichte

[consus]

Equidem gaudeo, optime Christophore, quod celeriter vexilla piscatoria Cororum* investigasti. Denuo te nunc vocat ordo.
_____________________________________________________
* Cori (vel Curones vel Curlandi): cf. Vita Anskarii auctore Rimberto 30.

[Christophorus]

Nunc quaeruntur duo instituta Germanica, ubi libertas abest vel aberat.

Sunt notiora acronyma eorum, quibus ternae litterae sunt, prima littera inter se differunt.

[consus]

CHRISTOPHORO sal.
Cogitare te puto de JVA, id est de carcere, et de NVA, id est de quodam exercitu anno MCMXC dimisso.

[Christophorus]

Valde gaudeo, quod tu, Conse optime, solutionem tam celeriter invenisti.

[consus]

Amicis suis doctissimis sal.
Duo sunt artis opera in quibus, ut ita dicam, ‚baca laurina‘ et ‚herba viridis‘ tenero amore inter se coniunguntur: alterum opus sane lepida est fabula, alterum symphonia una cum choro sine verbis canens.
Quae opera?

[Tiberis]

aenigmate vere obscuro nos vexas, o Sphinx Rhenana. nam "symphonia una cum choro sine verbis canens" quid est aliud nisi symphonia cum saltatione scaenica, quae nostra lingua "Ballettmusik" appellatur? sed in eiusmodi symphoniis nullam inveni, quae ad "herbam viridem" pertineat. an verba tua parum bene intellexi ? timeo, o Sphinx clementissima, ne aenigma solvere non possim, nisi quid auxilii praebueris...