aenigmata

[consus]

Iusto me iure, mi amice, oras ne neglegam verba Nomen dederunt castra operi suum. Inveneram quidem verbum Arabicum quasr = Ksar < castrum, sed nihil interesse putabam inter agadir et ksar.

[Tiberis]

Perfecte nunc rem explicasti!
Scripsi quidem non multum inter utrumque aedificium (scil.Agadir et Ksar) differre, sed illa, quae agadir appellantur, arcium similiora sunt, cum in his (sc. Ksour) turres deesse soleant.
nunc autem denuo te vocat ordo.

[consus]

Audaces quondam libertatis vindices
Columnam celsam vi fregerunt fortiter.
Vacuatus ille permaneret ne locus
Rotunda res tum structa est tangens aethera.
Quae res illustris his latet verbis meis?

[Tiberis]

Rhenana Sphinx nos excruciat nimis.
Rotunda quid sit res, ego nescio,

quae caela tangat vertice alto

aedificata loco columnae.

Abs te peto ,Sphinx, auxilium ut feras :
Aut tempus ede aut res ubi gentium

possimus illas invenire,

amplius ut teneamus hastam.

[consus]

Ingeniosissimo tuo carmine delectatus, mi Tiberis, facere non possum quin hoc tibi modo auxilio veniam:
Urbs in qua celsa illa columna quondam posita erat a Vindobona distat, si directam viam aeriam ingressus cursum CCXCVIII graduum tenes, circiter milia p. C׀ϽCXXII.

[Tiberis]

cursu ego directo veni Dublinium ad urbem:

aethera quae tangit, ferrea ibi stat acus*.

ante ibi pila loco fuerat Nelsonis eodem,

vi quam diruerat seditiosa manus.

* Spire of Dublin appellata

[consus]

Tetigisti acu, mi amice! Gratulor, denuo corona dignus es laurea.

Quod vero ad urbis nomen pertinet, quaedam mihi movetur dubitatio; apud Claudium enim Ptolemaeum hoc scriptum videmus nomen: Ἒβλανα πόλις. Nescio an etiam Ebiana appelletur.

[Tiberis]

Ἒβλανα πόλις

heu, novis opus est mihi perspicillis
In Orbe Latino cum nomen urbis legerem, l litteram pro i habui. O me pullum caecum!
versum correxi.

[Tiberis]

Ecce novum:

Qua viatorem alliciebat ursus,
ut locum secum peteret sacratum,
ire scalis caeliferis iuvabit
tempore nostro.

quis rem explicabit?

[Tiberis]

omnes cum taceant neque ipse Consus
- Oedipus merito sagax vocatus -
hanc rem solvere possit, ut videtur,
haec adiungere nunc volo, sodales:
Scalas Austria habet locumque et ursum.
quem ne credideris feram esse veram...

[consus]

Splendida misisti – fateor - mihi verba, sodalis,

Sed stupida est mea mens: Spes prope adempta iacet.

Forsitan ante oculos tibi obversetur ursus quidam qui Theodisce 'Ötscherbär' appellatur. Est ordo carrucarum quas machina vi electrica mota via ferrata ad Mariae Cellam, id est quasi in caelum trahit.

[Tiberis]

gratulor! nunc est tibi res soluta
optime. nam ferrivia et sacratus
est locus tandem patefactus, ad quem
nos via ducit.

[medicus]

Tiberim amicum magnum ferriviarum puto, an erro? Iam saepe aenigmata de his posuit.

[Tiberis]

Minime erras, o medice. sed etiam Consus noster ferriviae amantissimus est. quod cum non ignorassem, id ipsum posui aenigma.

[consus]

Volare leviter vir sollers Egnatius
Cuiusdam stirpis semen quondam viderat.
Eius miratus formam valde commodam
Alas construxit quae portarent machinam
Tenues per auras: visu res mirabilis!

Quae res? Quod semen? Quis vir? Ubi gentium?