aenigmata

[Tiberis]

Tiberis Conso suo s.p.d.

Egnatius Etrich, vir ingeniosissimus, semine Zanoniae adductus novum construxit aeroplanum vi machinae propulsum. Quod instrumentum volaticum "columba Etricchiana" appellabatur.

[consus]

Ignosce quaeso, mi amice, serae gratulationi! Tanta enim celeritate aenigma solvisti ut vox mihi faucibus haereret. Nunc demum respiro...

[Tiberis]

musicus praeclarus ad carmen quoddam maestissimum a poeta celeberrimo compositum modos fecit. cuius carminis initium sic Latine reddidi:

Ibamus una rebus in arduis
casus per omnes rebus et in bonis.

Nunc nos fatigatos eundo

terra silens habet et quieta.

nomen poetae?
quis musicus?
nomen operis?

[consus]

Quamvis timeam, mi Tiberis, ne quadam temeritate in errorem inducar, tamen facere non possum quin hoc modo ad interrogata tibi respondeam:
nomen poetae? Iosephus de Eichendorff ("Rubente vespere“, id est „Im Abendrot“*).
quis musicus? Ricardus Strauss (fec. a. MCMXLVIII pr. Non. Mai.).
nomen operis? Pars quarta Carminum quae dicuntur Supremorum (id est Theodisce „Vier letzte Lieder“, AV 150 / TrV 296).
________________________
* Wir sind durch Not und Freude
gegangen Hand in Hand,
vom Wandern ruhen wir
nun überm stillen Land.

[ille ego qui]

Duorum summorum ingeniorum carmina, o Tiberis, quam ingeniose in unum - Latinissimumque - contexuisti! quam digna imitatio, immo aemulatio! macte virtute!

[Tiberis]

perfectissime, mi Conse, rem explicasti. gratulor!
laus tua, mi Christiane, magno mihi est honori!

[consus]

Oppidum etiamnunc notum est castello, fabula ficta fretoque quondam praecluso.

Quod oppidum?
Quod castellum?
Quae fabula ficta?
Quod fretum quondam praeclusum?

[Tiberis]

Salve, mi Conse
ni fallor, Gades abs te quaeruntur, oppidum prope fretum Gaditanum situm; quod fretum sescentis fere abhinc milibus saeculorum ita fuit praeclusum, ut mare Mediterraneum exsiccaretur.
fabula autem ficta est de Hercule, qui mala Hesperidum aurea auferre iussus erat.
Castellum Sancti Sebastiani in insula situm initio saeculi XVIII. exstructum est.

[consus]

Consus Tiberi amico suo doctissimo s. d. p.
Summa denuo admiratio vocem mihi intercludit; eximio enim ingenio tuo Oedipodionio aliter ac ipse cogitabam aenigma in totum solvisti: Gades! Gratulor! Sed mihi aenigma coquenti ante oculos obversabatur oppidum Hydruntum: castellum Aragonense, Horatii Walpole liber qui inscribitur The Castle of Otranto, fretum Hydruntinum bello I mundano praeclusum. Anno MCMXVIII a. d. IV. Id. Iun. navis bellica cui nomen erat Sanctus Stephanus (Hungarice Szent István) cum hoc fretum perrumpere conaretur duabus percussa torpedinibus Italicis depressa est.

[Tiberis]

Ecce aenigma geographicum vel mathematicum

in urbe quadam aestate ineunte (hora scilicet meridiana) statua duorum metrorum umbram facit CXLVIII fere *centimetrorum. gradus longitudinis, in quo urbs sita est, dimidio minor est quam latitudinis.

quae urbs?

[consus]

Consus Tiberi amico artis nauticae peritissimo s. d. p.
Media nocte...: Forsitan liceat hanc inire rationem:
h = angulus sub quo sol a. d. XI Kal. Iul. hora meridiana spectatur.
tan h = 200cm/148cm = 1,35135
Sequitur h = 53,5°.
δ = declinatio; δ = +23,5°(illo ipso tempore).
Quaeritur β, id est latitudo, quae hac ratione efficitur:
β = 90° - h + δ
Sequitur β = 90° - 53,5° + 23,5° = 60°.
Quaeritur λ, id est longitudo: λ = β/2 = 30°.
Sequitur 60°N 30°E.
Una sola urbs hoc fere loco videtur esse sita: Petropolis (Санкт-Петербург).
Utinam ne falsa ducar ratione!

[Tiberis]

Nauticis rebus quoque te eruditum
praestitisti re bene persoluta.
Gratulor! Cedit tibi doctiori
Sphinx superata.

[consus]

Amicis suis pariter omnibus sal.
Poeta quondam se ipsum eodem discidio laborare dixit quo totam rerum naturam. Quod discidium imitatus statuarum artifex mirum sane et insolitum poetae monumentum aeneum in quadam urbe constituit.
Quis? Quid? Ubi? ...

[Christophorus]

Fortasse statua Iacobi Joyce artificis Mate Čvrljak in oppido Pula?

http://histrica.com/de/istra/blue/pula/james-joyce.html

[consus]

Erras, mi Christophore. Ecce auxilium tibi fero: Remane modo in Germania! Conspicitur in quadam urbe monumentum mirum quasi eodem fere modo discissum et re vera diffractum quo animus poetae.