aenigmata

[Tiberis]

Tiberis Conso amico suo s.p.d.

ego quoque rostrum illius navis nihil aliud esse puto nisi ornamentum apotropaeum. nam quae causa fuisset, cur navis nostra vinearia isto rostello - si modo posset - hostilem percuteret navem ? non ad vera pericula prohibenda id carinae praefixum esse censeo, sed ad ficta arcenda, oculorum simile - Persice "miribota" appellantur -, quibus "oculi mali" aliorum arceantur.

vale !

[Tiberis]

ecce novum aenigma :

quaeruntur duo oppida : utrumque adiacet eidem mari, sed multa centena milia distant.
utrumque a suo conditore eodem nomine appellatum est; nostris quoque temporibus altero ad alteram nationem pertinente utrumque tamen oppidum idem nomen habet a pristino scilicet paulo diversum, ita tamen, ut originem facile cognoscas.

quae oppida?

[consus]

Consus Tiberi Sphingi Austriacae versutissimae s.d.p.
Hemmm --- magna quidem est quaestio, sed effrenata quadam audacia fretus quaerenti tibi deesse nolim: Equidem duas esse puto urbes maritimas, quarum altera Karthago (nostra aetate suburbium urbis Tunis)appellatur, altera Carthago sive Carthago Nova (Hispanice: Cartagena). Iam timeo, ne falsa opinione ductus Sphingis fiam pabulum... Utcumque se habet res, cura ut valeas.

[Tiberis]

Tiberis Conso amico suo s.d.p.

vehementer doleo te errare, mi optime Conse. primum, quod Cartagena (Carthago nova) , ut quae urbs plus CC milium sit incolarum, vix oppidum potest appellari, deinde , quod nomen urbis Hispanae aliquantulum ab Africana differt.
qua re te oro respicias oppida ea esse , non urbes; utrumque enim oppidum non plus triginta milia incolarum habet.
utrumque denique oppidum hoc quoque tempore eodem nomine (!) appellari solet, licet ab incolis alterius oppidi nomen indigenum praeferatur , quod a solito et usitato paulo diversum est.

vale !

[consus]

Oh - oh - o me miserum! --- Tamen gaudeo, optima Spinx Styriaca, quod in errore mihi versanti parcis tam benevole. Nunc omnia mihi oppida sunt mente percurrenda, quem laborem immensum praedurumque esse puto. Quid ergo mirum, si timeo, ne aenigma tuum tam difficile, priusquam hic annus exierit, recte solvere non possim? Quam ob causam felicissimum iam nunc tibi exopto anni MMIX initium.

[Tiberis]

non est causa, mi Conse, cur tantos timeas labores, praesertim cum ea oppida minime sint ignotae.
sed anno iam exeunte volo me esse clementem. ne nimis excrucieris ,haec de altero oppido addere velim: OPPIDUM ERAS PULCHRUM , SED MULTIS GRANDE SEPULCRUM

utcumque se habet res: et ego tibi, mi amice spectatissime, felicem faustum fortunatumque annum MMIX exopto. utinam omnia optata bene tibi eveniant !

vale!

[consus]

Cum litteras caeruleas viderem, mi optime Tiberis, quasi fulmine ictus sum. Nonne oppidis nomen est Callipolis (< Καλλίπολις = Pulchrum Oppidum)? Alterum oppidum in Apulia situm est: Gallipoli; alterum in Turcia ad Hellespontum: Gelibolu, quod oppidum anno MCMXV pugna cruenta sane et calamitosa clarum factum est. Spe nunc teneor magna...

[Tiberis]

...et quidem merito, cum ea oppida sagacissime investigaveris. gratulor !
nunc autem tuum est, mi optime Conse, primum ineuntis anni aenigma proponere.

[Merkur]

O amaram ignenii dulcedinem!
Investigavisti, hercle, optime conse atque sapientissime, oppida. De oppidis autem callide inventis cum nos certiores fecisti, sustulisti epigramma lepidissimum.

Non multum abest, quin adducar, ut - Divi Augusti exemplum mihi ob oculos versatur - exclamem: Redde, conse, versus!

Da nobis, conse, epigrammate diutius frui!

Gratias tibi.
M.

[consus]

Consus Mercurio s.d.p.
Cum litteras illas caeruleas viderem, mi amice, aenigma a me solvi posse putabam. Quam ob rem hoc epigramma irritum delendum esse censui:
Nonne vides tabulam fixam mihi fronte trabalem?

Incluta me fugiunt oppida. Quae ratio est?

Cura ut valeas.

[consus]

Non ego sum Proteus, etiamsi corpore vertor.

Membra mihi septem, quae variare queo.

------------------------------------------------------
Quid haec verba sibi volunt?

[Apollonios]

salve mi Conse,

hebdomadam solutionem esse puto sex e diebus compositam.

[consus]

Equidem valde doleo, Apo optima, quod in errore versaris; num res corporea est hebdomada?

[Princeps]

Salve, optime Conse!

Si septem membra sunt septem ora, fluvius quoddam fortasse tibi est in animo.

Verg. georg. IV,292: septem discurrunt in ora
Aen. VI,800: septem gemini turbant trepida ostia Nili

Nilus ab aliis septemfluus et septemflex appellatus est.


[Etiam Tiresias mihi venit in mentem, quod in septem corpora mutatus est. ]

[consus]

Responsa, mi optime Princeps, homine doctissmo quidem digna dedisti, sed tu quoque
in errorem raptus es - - - iterum vehementis mihi causa doloris. Iam timeo, ne parum diligenter scripserim. Hoc ergo, quo res clarior fiat, addere mihi liceat distichon:

Multiplicem ludum genuit me Serica terra:

Septem sum formis compositus variis.