aenigmata

[Christophorus]

Ille Michel Ferla mihi plane ignotus est.

Praenomen quaesitum brevius est.

[consus]

Nihil aliud, mi Christophore, hac nocte scribere possum nisi Ian Gillan, qui cantor carmen videtur composuisse de Fumo qui 'ferebatur supra aquas' (cf. Gen 1, 2). Praenomen athletae puto esse Dan vel Jan vel aliud huius modi. Spem abicio.

[Christophorus]

Dimidium facti ...

Non prima littera mutanda est.

Non solum est praenomen, sed etiam terminus physicus vel - si ita scribere licet - chemicus.

[consus]

Gratias tibi ago maximas, optime Christophore; clementissime enim abs te adiutus repperi nomen Ion Tiriac, a quo Boris Becker instructus est.

[Christophorus]

Ita est! Gratulor.

[consus]

Amicis suis sal.

Ecce stropha carminis celeberrimi saec. XIX compositi, Latine scilcet reddita his fere verbis:

|: Stellae caelestes benigne nunc desuper terram intuentur. :|
Stellae caelestes benigne nunc desuper terram intuentur.
Anima eius pergit proficisci.
(Sequuntur versus intercalares.)

Quod carmen?

[Tiberis]

Sphingi Rhenanae sal.

cum multum iam temporis frustra insumpserim in hoc carmine reperiendo, hoc unum abs te peto, ut nobis Indices, lingua Theodisca id compositum sit necne. Miserere nostri, qui in tenebris erramus...

[consus]

...cum multum iam temporis frustra insumpserim...

Ea res valde mihi dolet, mi Tiberis. Ne amplius te incommodem, hoc modo tibi velim succurrere: Illa carminis verba ex Anglico vel potius Americano converti in Latinum (forsitan parum polite). Compositum est carmen medio fere saeculo XIX ne memoria viri honesta laude digni amitteretur.

[Tiberis]

Tiberis Conso amico suo s.d.p.

verbis tuis novissimis adductus (memoria viri ..laude digni) non facere potui, quin de praeside Abraham Lincoln cogitarem, sed in hoc quoque vestigio sequendo nihil profeci. quin etiam uxor mea quamquam litterarum Anglicarum peritissima me adiuvare non potuit. quid mirum, quod hastam abicio?

[consus]

Noli hastam abicere, mi amice! Di meliora! Tuo quidem iure de Abraham Lincoln cogitas, neque vero is est vir honesta laude dignus a me commemoratus. Cogito enim de quodam viro qui gloriam adeptus est quod quasi idem sibi proposuerat atque Abraham Lincoln, sed vitam amisit quindecim mensibus antequam Lincoln principatum Foederatarum Civitatum iniret.

[Christophorus]

Solutionem inveni sperans auxilium non Tiberi soli scriptum esse:


Nomen carminis: Corpus Ioannis Fusci (John Brown’s Body)


https://www.youtube.com/watch?v=jso1YRQnpCI

[Tiberis]

eheu! nimis temere hastam abiecisse videor. nam quis est, qui carmen illud celeberrimum ignoret?

[consus]

Consus CHRISTOPHORO et TIBERI amicis suis spectatissimis s. d. p.
Gratulor tibi, Christophore, de feliciter reddito responso terminali. Fieri autem non potest, quin addam aenigma etiam abs te, Tiberis, nisi desperatione quadam affectus a vexillo ut ita dicam discessisses, perfecte solvi potuisse.
Valete!

[Christophorus]

Quaeruntur duo oppida ad flumen (et olim in eodem magno imperio) sita.
Nomina sunt sex litterarum et una sola littera differunt.
Nota sunt - ut ferunt - propter caedem mortemque permultorum hominum.
Inter caedes anni MCXXXI sunt.

[consus]

Duo mihi se offerunt nomina, optime Christophore: Verdun (Mosa nomen fluminis) et Verden (Alera nomen fluminis). Verdun: acerrima pugna anno MCMXVI, Verden: caedes Saxonum anno DCCLXXXII).

Inter caedes anni MCXXXI sunt.

Nonne potius "MCXXXIV"?