Aenigma culinarium

[Zythophilus]

Quo de cibo loquor?
Aenigma non esse difficile fatemur.

En, tenues reseca partes de carne uitellae –
sumere, si mauis, membra suina potes –
Malleus, ut fiant tum mitia, uiscera pulset
frustaque dein spergat pulsa farina leuis.
Oua manu rapida tunc misce tenacia lacti,
quis lateat mixtis mox uitulina caro.
Viscera nunc opus est obducere pane fricato,
cuncta sigilineo fragmine mica tegat.
Feruens frigat adeps et carnem mitiget ignis,
aurea uti lumen crusta gulamque iuuet.

[Tiberis]

salve, Zythophile !
quamquam artis coquendi minime sum peritus, tamen haec respondere ausim:
nonne lepidissimum hoc carmen - num ipse eos versus composuisti? - est de cibo Austriaco "nationali", qui dicitur, id est de resegmine Vindobonensi ?
ceterum aenigmata loco sibi proprio proponantur: hoc in foro thema, quod inscribitur "aenigmata" , facile invenias!

vale!

[consus]

Verbis vestris iucundissimis perlectis, amici carissimi, incredibili me fame premi sentio...

[Zythophilus]

MARTINVS TIBERI
Optime fecisti! Aenigma poeticum inter cetera aenigmata ponere in animo habui, sed me errasse uidelicet. Ego quoque fame uexor sitique. Quid ergo melius quam ...
Gaudia promittit mihi sicco pyxis aena;
Quae res fulgenti pyxide clausa latet?
Heus, sera diripitur, profertur stridulus humor,
ecce liquor redolet, quem dedit alma Ceres!
VALE

[consus]

..........ergo bibamus! Quid nisi cervesiam triticeam Bavaricam? Tibi palatum sapere puto.

[Zythophilus]

MARTINVS TIBERI
Num metra fecerimus nos ipsi, quaerere noli!
Carmina nos, petimus, ne rapuisse putes.
Mittere quae libuit, nos composuisse, rogamus,
credas, iussit enim scribere Musa petens.
Scribere Musa iubet; non posse resistere Musae
meque eius fateor dulcia iussa sequi.
VALE

[Zythophilus]

MARTINVS ZYTHOPHILVS CONSO
Infusus calici male olet - uae! - pallidus humor.
Credere uix possum: Peior odore sapor!
Quonam, prode mihi, uos potum more coquatis?
Latrinae latici pocula rapta reor.
VALE