Nugae

[Zythophilus]

Qua Catharina potens portumque et moenia fecit,

Pontica continuis motibus unda sonat.

Nobilis exilium uates hac questus in urbe,

de uetere hic scalae seditione monent.

Certe scitis, iter mihi quo factum sit. Odessae

- nec derant Cereris pocula plena – fui.

[Zythophilus]

Vindobonae uideor uersari; uersor Odessae,

qua similis Musis sacra sonisque domus.

[Tiberis]

Fervidus torret calor arva sicca,
aestuoso caelo homines laborant,
flaccidaeque imbres sitiunt aristae u-
more carentes.

Sole tabescit glaciata moles
usque adhuc servata gelu perenni.
Montium forma solita carebunt
posteriores.

[Zythophilus]

Slesiacos ad agros fit iter, fit ad oppida nobis,

quo uehat – ite citi! – raeda per arua uagos.

[Zythophilus]

Pulchra Vratislauiae est media sita curia in urbe;

quam prope more meo saepe diuque fui.

Arsne decorque fuit nobis ibi causa morandi?

Ad plateam latices – heus – tria tecta coquunt.

[Zythophilus]

It per aquas Dominus neque in undis mergitur altis,

uerum nauiculam discipulosque petit.

Cum fluctus quatiant et saeua procella uehiclum,

ne pereant omnes flumine, turba timet,

sed mare tranquillans et aquas facit ille furentes,

uentus uti cedat defugiatque timor.

[Zythophilus]

Insignis domus aureo cane extat,
tectum est ad mediam situm plateam.
Cur nobis memorantur hae uetustae
aedes? Fit Cerealis humor intus!

[Zythophilus]

Spumans igniferam coquitur ceruisia ad Aetnam.

Ipsene Vulcanus grana ibi miscet aquis?

Est Laertiadae sacer humor, ut hoc latice hausto

multo censeam iter longius esse domum.

https://pbs.twimg.com/profile_images/48 ... 00x400.png

[Zythophilus]

Venanti nuper mihi bestia saeua necatur.

Quo telo? Celerem muscipulo neco eam.

[Zythophilus]

Quassa Pithecusa est uehementibus insula terrae

motibus et dicunt interiisse duas.

Occisas querimur, querimur tot tecta ruisse!

Ne noceat miseris terra furore nouo!

[marcus03]

Venanti nuper mihi bestia saeua necatur.
Quo telo? Celerem muscipulo neco eam.

Miror, quomodo illam bestiolam reddideris tam saevam? Nonne eam carmine laeseras?

[Zythophilus]

Ignorare reor te, credule Marce, pericla:

Fortis ego aggressus monstra metuque carens.

[Zythophilus]

Magnificis arcis portis sunt saxea signa,

Herculeaque manu monstra timenda cadunt.

[Zythophilus]

Laurus militibus dignis promittitur – est mos;

saepe sepulcra tamen sola, cupresse, tegis.

[Zythophilus]

Quid est, Camille, nunc noui? Effugit tempus
et labitur calens cito pede haec aestas.
Mox incohabit messibus repletisque
uuis calore uique deditus mensis,
mox dulce dolio recensque tradetur
mustum, quod acre dormiens merum fiat.