Nugae

[Zythophilus]

Ferre Valentinum cum dicant dona rosasque,

soluas ipse uolunt donaque des sibi, amans.

[Zythophilus]

https://beerstore-2032.kxcdn.com/wp-con ... 632397.jpg
Producunt etiam Cereales arua liquores,

quae tenebris pulsis prima salutat Eos.

[Zythophilus]

Nox, ut fit, sequitur diem quieta
et cras post Domini diem relinquam
lectum mane uocante me labore.
Vt sint somnia grata dormienti,
opto, sitque quies, uti cubile
det uires animoque corporique.

[Zythophilus]

Honigbier klein.PNG (183.59 KiB) 31602-mal betrachtet

Condita est apium dulci ceruisia dono

nec uos infitias ire potestis, apes.

[Zythophilus]

Nec uer est neque hiems, rarus cum decidit imber

et densis nebulis solque polusque latent.

Nec tepida aura fouet nec frigore prata premuntur,

teque uocat frustra flos tenuis, pigra apis.

Quid faciam, mensis cum tertius incipit anni

nec iuuat ire foras nec remanere domi?

[Zythophilus]

Orta diem Domini finit nox otiaque atra:

Post tenebras solitus, qui fuit ante, labor.

[Zythophilus]

A multis hilares dies aguntur,
a multis bibitur, ioci mouentur.
Bacchanturque canuntque uoce laeta,
uultus larua quibus tegit caputque
aut uelamina picta tergus ornant.
Vsus ueste, quis esse uis, es – aude! –,
nam cuncta his fieri licet diebus,
sed cum gaudia erunt caroque dempta,
ut mos est, cinerum die silebis.

[Zythophilus]

Triste quadraginta est spatium siccumque dierum

nunc coeptum osque diu carne fidele caret.

Cruxque cinisque tibi signant, o grex pie, frontes,

qui te sic Domino conciliare uelis.

[Zythophilus]

Castor stagna colit colitque flumen:
Cur non adnumeretur hic natator
uelox piscibus, incolis aquarum?
Cum nunc lege pii sacra uetemur
haec per tempora dura carne uesci,
castorem ut capiam, lacus petetur unda,
quem possim merito uocare piscem.
https://de.wikipedia.org/wiki/Biber#Kulturaspekte

[Zythophilus]

Mox iter ad Nilum facies, mox templa uetusta

et ueterum regum clara sepulcra petes.

Pyramidasque adiens priscam miraberis artem

et poteris magnum Sphinga uidere simul.

Vt sit iter felix, opto, et tibi fausta sit Isis

et sit Niliaca fortior humor aqua.

[Zythophilus]

Cur haec non solito uiola albet parua colore?

Oblita es sociam pingere, Flora, tuam.

[Zythophilus]

Cum nescire uolare pumilones
cognorim, uideo tamen uolantes
et cursu celeri uehi per auras
miror: Sunt auibus pares et usis
ala papilionibus dolone
paruos Daedaleo licet leuare
artus? Non licet: Vt uolent, uirorum
hos ui crede iaci manuque forti.
http://danceswithbass.com/2018/01/08/th ... f-tossing/

[Zythophilus]

„Rex uenit!“ exclamant, qui stant prope moenia, ouantque,

„Rex uenit!“ urbs gaudet, nunc Dominus quod adest.

Num uenit usus equo forti duce uel principe digno,

num uehitur curru magnificisque rotis?

Inque uia positis incedit uestibus urbem

innumerique hilares uociferantur: „Aue!”

Arboribus ramos euellit turba salutans:

Post paucos fugient gaudia magna dies.

[Zythophilus]

Denique sunt concessa laboribus otia nostris:

Laetus iter facio, laetus ad aequor iter.

Insula, quam petimus, tibi, apostole, cognita, Paule,

cum ratibus fractis acta sit hic tibi hiems.

Nec fractis uenio huc ratibus, neque hiems ut agatur,

me uero celerem ferrea uexit auis.

Sole marique frui, si me sinat unda lauari,

atque aestas foueat terga pedesque uolo.

Nonne sit, exquiris, mihi frumentarius humor:

Num facerem, dignus ni foret humor, iter?

[medicus]

Insula, quam petimus, tibi, apostole, cognita, Paule,

Requiras vestigia apostoli, Zythophile! Sunt, qui dicant Paulum numquam illa in Insula fuisse


https://www.zeit.de/1988/52/paulus-war-nie-auf-malta