Nugae

[Zythophilus]

Sarmata quae quondam coluit, colit arua Polonus.

Haec uetere utendi nomine causa patet.

[Zythophilus]

Cum primus anni cesserit alteri
mensis, petendum coeperit otium,

clausae scholae nostrae manebunt,

haud breue fiet iter per auras.

Heus, constitutum est ire Valentiam,
qua dulce possim sub Ioue et in foro

haurire uinum aura tepente

uel Cereris gelidum liquorem.

Heus, per uias cras et plateas uagans
et, Turiae qua flumen iit prius

latum, ambulabo nec timebo

frigus aquasque polo cadentes.

[Zythophilus]

Vim fluuii ripa iam non retinente tumentis

saepius immodicis icta Valentia aquis.

Cogitur ire rapax mutatis cursibus amnis,

moenia ne flumen tangere possit iens.

Cum datus humana tibi sit nouus alueus arte,

lato pro fluuio, Turia, prata patent

atque errans gaudet spatiosa per arua iuuentus,

qua salsum ante loquax ad mare flumen iit.

Num tolero hoc aegre? Num deest mihi copia aquarum,

cum liquor ablatis sit Cerealis aquis?

https://www.tudespensa.com/comprar/lata ... uave-36430

[Zythophilus]

Sanguine caesorum quam tinxerat Hannibal olim,

arx hodie nobis scansa, Sagunte, tua est.

https://valencia.erasmus-spain.net/italiano-sagunto/

[Zythophilus]

https://www.google.at/imgres?imgurl=htt ... mrc&uact=8
Flumen ubi fuerat latum piscesque natarant,

excipit hospitio nunc patula arbor aues,

nec fluit ulla loquax sub pontibus unda cauatis,

quamquam, cur fieret pons ibi, causa fuit,

sed magnorum operum lapides mirantur et arcus

stare super sicco se subitoque solo.

[Zythophilus]

More fuit solito muris ingentibus ingens

porta, sed euersis moenibus alta manet.

[Zythophilus]

Magna patella tuam, bene cocte cunicule, carnem

gallinaeque hilaris mitia membra tenet.

Additane his dapibus limacum corpora lenta?

Et cepas acidas scimus et esse fabas?

Quare, quae candere solet, sit, quaeris, oryza

lutea? Nosce rubrum tinguere grana crocum!

[Zythophilus]

Magna patella tuam, bene cocte cunicule, carnem

gallinaeque hilaris mitia membra tenet.

Additane his dapibus limacum corpora lenta?

Et cepas acidas scimus et esse fabas?

Quare, quae candere solet, sit, quaeris, oryza

lutea? Nosce rubrum tinguere grana crocum!

[Zythophilus]

Quomodo destituas, noua cum sit cara, puellam?

„Cara puella, uale! Proxima amanda mihi est!”

[medicus]

„Cara puella, uale!

puella= Valencia

[Zythophilus]

Audimus pueros queri, quod octo
actum dulce sit otium dierum
et sit discipulis schola – heu! – petenda,
audimusque etiam queri magistros.

[medicus]

Tune magister puella Hispanica relicta quereris?

[consus]

Consus Zythophilo sal.

Donato rude questibus replere
Fas non est mihi de labore caelum;
Sed tecum doleo, videnda rursum
Cras cum sit celebris tibi palaestra.

[Zythophilus]

A me licta Valentia est amoena,
uerum, quam, medice, aestimas puellam,
magna est urbs, ubi Turiae remotis
undis alueus aridus remansit.

[Zythophilus]

Omnes, Conse, queri solere apud nos
scito, cum quasi sit querella nobis
natura altera. Quis ferens labores
gaudet nec queritur cubile linquens?