Nugae

[Zythophilus]

Nobis nunc fit iter, petitur Posnania nobis

lataque nos celeris raeda per arua uehit.

Nec daps uel latices, nec candida templa nec illuc

turba puellarum nos leuis ire iubet,

uerum causa uiae est ad Vartam lingua Latina,

ut digne incipiat cara Camena coli.

[consus]

ZYTHOPHILO SAL.

Te 'thamalum' legi quaesisse ut membra levares.

Languenti calamus iam tibi lapsus erat?

[Zythophilus]

Inuenit thamalus tamen poetam,
ut lapso calamo quies daretur.

[Zythophilus]

Sextam mille duplex horam mirantibus haedus

indicat. Inde datur somnus utrique apro.

[Zythophilus]

Haud procul a stagnis Elias otia grata

factus agit uates, qua sonat unda lacus.

Alta palus uersus resonare uidetur – an audis? –.

ut iubeat calamum cara Camena capi,

sed potius resonat fluitans ceruisia in ora

et pro Pieridum uoce Lyaeus adest.

[consus]

Mox iter ingrediar visendi te studio, ultima Thule.

Sit mare tranquillum supplice voce rogo.

[medicus]

Navigabisne Gronlandiam,conse? Ibi ursi maritimi tibi cavendi erint.
Fac valeas et sospes revertaris!

[Tiberis]

Mox iter ingrediar visendi te studio, ultima Thule.

Longius it solito , Thulen qui visere tendit.

longius et solito versus et ille cadit.

bene ambula!

[consus]

Longius it solito , Thulen qui visere tendit.

longius et solito versus et ille cadit.

Versibus tuis facetissimis , mi ingeniosissime amice, laetissimum mihi movisti risum febrimque quae iter paranti mihi mentem obscuraverat penitus pepulisti: gratias tibi ago maximas. Ecce distichon retractatum:

Mox iter ingrediar cupidus te visere, Thule*:

Sit mare tranquillum supplice voce rogo.

Et Musas ipsas censeo placandas esse:

Castae Castalides, mihi parcite verba liganti

Immodico calamo: me pudor aeger habet.

______
* Norvegia.

[Zythophilus]

A nobis fit iter; Pragensia moenia adimus,

sed dubitans quaeris: „Solane moenia adis?”

Magnificas plateas pontemque petemus et arcem

et fortasse liquor dein Cerealis erit.

[Zythophilus]

Te nunc Roma tenet, canenda Roma,
quae tot carmina tradidit poetis,
quot fures fora magna peruagantur
quot delubra colunt citae columbae,
quot fanum et plateam petunt Petrinam,
quot constare solent in angiportis
noctu quadriuiisque prostitutae.

[Zythophilus]

Cum uerseris, ubi Catullus amens
multo carmine deprecatus illam est,
cui passer fuerat, neque orsa nobis
das, Elia, neque ulla carmina edis.
Nec maestis quereris metris amores
nec laudas Venerem deaeque dona
nec Romam memoras neque elegantes,
disertissime, Romuli nepotes,
nec – uae! – neptidibus dicas poema.

[Zythophilus]

Cui passer fuit et fuit Catullus
uates, Lesbia iam iacet sepulta.
Passer mortuus, ut fit, et Catullus,
uerum carmina saeculis peractis
et de passere Lesbiaque narrant
et quid senserit hanc amans Catullus.

[Zythophilus]

Obdormisse forum uidetur omne
tranquillumque iacet – mortuine
illi, quos habuit prius loquentes?
Pulsus Vulpius est; tacere eo coacto
gaudet turba tacens diu. Satisne
sit nil dicere, miror, ut quies sit.

[Zythophilus]

Qui lepidus calida uates aestate fuisti,

otia cum fuerint acta, magister eris.

Accipies dulci Musarum uoce tacente

clamorem pueri nec tibi dulcis erit.

Non tribuet calamus gaudenti metra papyro,

sed tibi tinguentur menda colore rubra.

Quid quereris? Nosti uictum tibi non dare Musas,

cum sua praecipiens membra magister alat.