De clade Winnendensi

[Zythophilus]

Quae mens impulerit, miror, quaeque insania muta

fecerit, ut caperet tela cruenta puer.

Vnde furor uenit, quem non prius esse putarant?

Quaenam tantum odium gignere causa potest?

Affirmant tacitum mirumque fuisse querentes:

Sub placido latuit – uae! – furor ore diu.

[Zythophilus]

„Talia cur fecit?“ Mirati quaerimus omnes.

„Talia cur fecit crimina?“ Causa latet.

„Talia cur fecit?“ Cuinam responsa placerent?

Credere mens oculis abnuit ipsa tacens.

[Apollonios]

tot conantur nugatores explicare illud maestissimum crimen - valde est gratum legere versus tuos describentes et maerorem et ambiguitatem nec nimis velociter incitationem solutionemve praebentes.

[Matthaeus]

Mihimet semel atque iterum venit in mentem animal solum esse hominem se ipse ultra suam naturam ponentem eoque naturam omnem delentem. Non enim hominis est instrumentis uti, quae a natura data non sunt - sicut arma. Ille puer se fortiorem putavit pistolam manibus tenens, sed sententia mea erravit prorsus: multo fuit infirmior...

Requiescant in pace innocentes.