Mortem obiit Fritz Muliar.

[consus]

Reliquit hodie scaenam in omne tempus Fridericus Muliar, qui (ut alia praetermittam) Schwejk Militis Probi partibus excellentissime actis eximiam sibi paraverat laudem. Sit ei terra levis.

[Zythophilus]

Egressum scaena mors pallida ademit agentem:

Vltimus huic plausus uix datus intus erat.

Partibus exactis mundana theatra reliquit:

Huius si placuit fabula, plaude et abi!

[Zythophilus]

Scaena patens terra est et mundus grande theatrum.

Actor homo est nolens aut sibi agenda uolens.

Partibus is uiuit, quae sunt, contentus agendis

an studet exoptans partibus ipse suis?

Rector ei partes tribuit, qui cogitat, aptas

an fors caeca suas cuique sequenda tamen?

Partibus e scaena cum iussi exibimus actis,

plausus erit nobis mortene parta quies?