De rebus raritate quadam memorabilibus

[consus]

Salvete, amici.
Cum Procopi secundum de bello Gothico (BG 2, 5) legerem, in rem incidi sane memorabilem, qua non medicriter me obstupuisse fateor.
In proelio miles quidam Romanus telo percussus est, idque prope nasum et supra oculum dextrum. Multo maior quidem teli pars pondere suo defracta est, sed cuspis per faciem infixa sub cute adeo latebat, ut ab illo milite omnino non animadverteretur. Quadriennio post cuspis illa ferrea αὐτομάτως, id est sua sponte, per cutem sensim foras exiens oculis subiciebatur, biennio tandem post e facie videtur tota excessisse.
Res utrum mira sit et ficta an vera et solida, aestimari oportet a medicis.

[consus]

Salvete, amici.

Praefatio.
Equidem Aulum imitatus Gellium, a quo nemo est quin Noctes Atticas sciat esse scriptas, hoc thema De rebus raritate quadam memorabilibus excogitavi. Si ergo cui vestrum res raritate memorabilis ante oculos obversatur, accedat modo et certiores nos faciat…

Ecce nova res memorabilis:
In Germania australi nuper feminae sigillum perantiquum repertum est, quod ante XXXV milia annorum ex mammuthi ebore exsculptum esse dicitur*. Exuberant eius mammae, patet ingens feminal: portentuosa quaedam mulieris imago orta ex mente virili. Nonne Venus illa Sueba sive Cavae Rupis soror maior natu videtur esse Veneris Willendorfiensis**? Quae quidem decem milibus est annorum minor.

___________________________________________________________________
* http://www.swp.de/nachrichten/regional/Regional;art1802,145881,D
** http://www.nhm-wien.ac.at/Content.Node/schausammlung/funde/a04.html

[Zythophilus]

Cum uectus peteret uir rustica festa camelo,

decidit – heu! – tergis, ebrius ut uir erat.

Naribus infractis est laesus; „Arabsne?“ requiris.

Alpicolam uidit decidere Oehnus iens.

http://tirol.orf.at/stories/378082/

[consus]

Errat Zythophilus! Duo namque fuere cameli:

Sanus erat quadrupes, ebrius ille bipes.

[Zythophilus]

"Ebrietate grauis si sis, conscende camelum,

ut te post calices bestia parca ferat."

Errat, qui suadet tibi talia, rustice. Crede,

nam celer alta nimis terga camelus habet.

[Zythophilus]

Agricolam cupidum reor inuidisse camelo:

Quanta est copia aquae faucibus hausta ferae!

Potando uoluit iumentum aequare bibosum:

Non imitandus aquam, stulte, camelus amans!