de miserrima condicione Latinitatis in Vaticano

[Pyrrha]

O tempora o mores!!
Modo in ephemeride Italica "Repubblica"* legi Encyclicam papalem his diebus apparituram serius in lucem prolatum iri, quod nimis difficilis sit Latine versu! Non satis esse Latinistarum satis peritorum, qui tali opere affidari possint; ceterarum linguarum versiones sine difficultatibus perfectas esse, solam Latinitatem labores praebere, idque eo ipso sub papa, qui Latinitatem alendam ac proferendam suscepit. O rem fere incredibilem, maximo Vaticano pudori, et ridiculam!

*********************
http://www.repubblica.it/2009/05/sezioni/esteri/benedetto-xvi-34/ritardo-enciclica/ritardo-enciclica.html

[Zythophilus]

Sermoni Latio nequeunt papalia docti

tradere, si uerum est, tempore uerba suo.

Num nequeunt? Potius male fidus suspicor illos,

o Benedicte, tuum uertere nolle librum.

[Archias]

Haha,

res profecto incredibilis est, in Vaticano ipso linguam Latinam morituram esse. nescio si bene certior factus sum, sed sententia mea est concilium in Vaticano, quod nova verba Latina pro difficilibus modernis rebus componat. num illud quoque difficultatem superare poterit?

[Tiberis]

"est tam difficilis Latina lingua."
docto indigna viro mehercle dicta !
haec num credere possumus, sodales ?
quam tristis status est Latinitatis,
ipsa si in media urbe Vaticana
perrari inveniuntur his diebus,
qui , quae scripserat ille papa sanctus,
possint reddere puriter Latine!
quid ergo faciendum erit ? proponant
quaequae scripserit ille papa verba,
nobis, qui cito transferamus illa
- istis dedecori sit! - in Latinam.

[consus]

Res ea terribilis non quit te tangere, Roma:

Vaticanus abest collis ab urbe procul.

[Zythophilus]

Te tua posse puto bene uertere uerba, sed esse

auxilio uolumus, si, Benedicte, petis.

[Zythophilus]

Septem Romulea colles – quis nescit? – in urbe:

Sanctus in octauo uertice papa sedet.

[Zythophilus]

Vaticana ferunt quondam mala uina fuisse,

dum dominabatur lingua Latina uigens.

Quale merum potent nunc Vaticana regentes,

stultitia ut fiat tanta, requirit homo.

[Pyrrha]

Miror quidem, quam oporteat in pessum verti res, ut et mihi, quippe quae sim neque vir neque catholica, concedant munus Latinistae in civitate sua.