de libris (et locis) vobis carissimis

[ille ego qui]

salvete sodales,
qui libri aut etiam loci ex libris excerpti vobis sunt carissimi (aut Latini aut Graeci aut etiam "barbari"), quos aliis (et mihi) legendos in primis commendetis? si vobis singuli loci vel versus vel sententiae cordi sint, hic si placebit proferatis (dummodo sint Latini sc.)!

valete.
ille

[consus]

Arma virumque loca celso grave culmine carmen!

Biblia Christicolis Romulidisque Maro!

[Zythophilus]

Qui claro cecinit mutatas carmine formas,
summo per lepidos hic sit honore libros.

[consus]

Accipe, quod multum placeat mihi carmen Horati:

Gaude simpliciter! Cena modesta iuvat.

Persicos odi, puer, apparatus,
displicent nexae philyra coronae,
mitte sectari, rosa quo locorum

sera moretur.

Simplici myrto nihil adlabores
sedulus, curo: neque te ministrum
dedecet myrtus neque me sub arta

vite bibentem.

___________________________________________
Cf. etiam http://www.merriampark.com/horcarm138.htm

[Medicus domesticus]

Salvete sodales,
Gratias ago maximas Catullo poetae, qui scripsit carmen XXXI.
Quis vestrum ignorat Lacum Benacum Sirmionemque?
Quis vestrum ignorat haec verba bene nota: “Desiderium patriae me tenet”?
Quis vestrum non gaudet se in patriam rediturum?
Catullus ille imprimis novit verba ut supra scripsi:

Carmen Catulli XXXI
Paene insularum, Sirmio, insularumque
ocelle, quascumque in liquentibus stagnis
marique vasto fert uterque Neptunus,
quam te libenter quamque laetus inviso,
vix mi ipse credens Thuniam atque Bithunos
liquisse campos et videre te in tuto!
o quid solutis est beatius curis,
cum mens onus reponit ac peregrino
labore fessi venimus larem ad nostrum,
desideratoque acquiescimus lecto?
hoc est quod unum est pro laboribus tantis.
salve, o venusta Sirmio, atque ero gaude;
gaudete vosque, Lydiae lacus undae:
ridete, quicquid est domi cachinnorum!

[consus]

Quattuor hi vates hodie fora nostra frequentant:

Naso, Catullus adest, vos quoque, Flacce, Maro.

Quis comitetur eos, si quaeres, nosse negabo.

Mox alii venient: hoc scio - certus ego.

[Tiberis]

gaudia magna mihi semper tulit ecloga prima:
leni corda movet veluti modulamine nostra.
mitior aspera nonne videtur sors Meliboei ?
Tityre, iucunda frueris felicior umbra.
sic modulos violae certantis cum violina
audimus querulae laetante sorore beata.

[Laecasin]

salvete sodales,
qui libri aut etiam loci ex libris excerpti vobis sunt carissimi (aut Latini aut Graeci aut etiam "barbari"), quos aliis (et mihi) legendos in primis commendetis?

Salve !

Non mediocres enim tenebrae in silva ubi haec captanda neque eo quo pervenire volumus semitae tritae, neque non in tramitibus quaedam obiecta quae euntem retinere possent.

Multo amo hoc (a Varro scriptum in libro V de lingua Latina) quod mihi id legenti semper fortitudinem in animum reddat.

[consus]

Carmina caelestis mihi sunt pergrata Lucreti:

Cedit relligio morsque levatur atrox.

[DomusAnguliPuensis]

E libris aetatis nostrae mihi praecipue placet conversio in linguam latinam operis ab A.A.Milne in originali anglice scripti "The House at Pooh Corner". Quam confecit et nomine latino "Domus Anguli Puensis" (hinc et nomen meum) edidit Brianus Staples admirabili acumine et eruditione, ita ut lectio non tantum magnum gaudium praestet, sed etiam ad vocabula sermonis cottidiani discenda magnae utilitatis sit. Dici opportet me antequam versionem latinam legerem textum anglicum iam admodum nosse - nescio an aliter lusus verborum in hoc opere frequentissimos intellexissem.

(quaeso errores si commiserim corrigatis)