Annus novus sit faustus et felix…

[consus]

Iane, da nobis, pater alme divum,
Mensium bis sex seriem serenam
Et vias anni varias novati

Dirige ductor.

[Zythophilus]

Vltima lux uenit; iam uult nouus annus inire.

Vrbs iam laeta canens uina coempta bibit.

Te saluere, biceps, iubeamus, Iane, rogantes,

prosper ut iste annus nos sit alente Deo.

[Zythophilus]

Quid nobis cedens tulit hic mortalibus annus?

Quid rapuit nobis? Prosper atroxne fuit?

Gaudia erant illis, hic clades questus amaras,

riserunt alii, quos lacrimasse putes.

Quidnam supplicibus succedens deferet annus?

Num placida hoc toto fiet in orbe quies?

Annus bella feret. Lacrimas miscebit amori,

sed te grata reget pax aderitque Deus.

[Tiberis]

Chartulae par est novus annus albae.
litteras quas constituere fata
scire sanctas quis poterit latentes
mentem oculosque ?

Nascitur paucis novus annus horis ;
prosperus felixque utinam sit ille !
dique vestra optata iuvent deaeque
cuncta benigne.

[Zythophilus]

Effugit hic horis cito delabentibus annus

et perit – heu! Media nocte peractus erit.

Vt clamore nouum magno uinoque salutet,

peruigilans peragrat laetaque turba uias.

Aethera mille uiris nunc fulmina missa colorant.

Annus uti prosit splendidus, optat homo.

[Apollonios]

cunctis salutem exopto pacemque sodalibus caris,
vobis sint viæ amœnæ, quies hortorum sit vobis
uno cantu turbata ebrio pinnigerorum
bene ut audiatis dulcem susurrum Musarum.

[Tiberis]

annum missilibus novum salutant
multis ignivomis et exeuntem
magno nunc homines fugant tumultu.
miror, cur ita se gerant, quia annum
inter praeteritum novumque certe
non multum intererit. gerentur anno
aeque bella novo,neque amoveri
et fames poterit gravesque morbi.

[consus]

Crapula nonnullos hodierno lumine lassat:

Haud Ianum, Bromium sed coluere nimis.

Iane Quirine bifrons, indulge pacifer illis:

Raro Nysaeus nectare complet eos.

[Zythophilus]

Ebrietas cedit; sanantur uulnera Bacchi.

Et medicamen homo sumit et aeger aquam.

Poturumque minus iurat se quisque reclinans

scitque hoc dicta die uerba ualere nihil.

[Willimox]

Castaneas dat hiems et annus iura iuranda,
Zytho praedixit, quo illa postvaleant:
Vinum nox nobis hiemalis misceat album
haustum, productas quo breviet tenebras.

[Zythophilus]

Quid annus hic mortalibus feret nobis?
Bonos dies habebit et malas horas.
Fames erit multis premetque paupertas
et bella ut antea gerent duces magni
idemque certe olebit ac prius stercus.

[consus]

Obduxit glacie nivibusque Patulcius arva,

Rheni quae fluvii limpida lympha lavat.

Nescio, Iane sacer, caelum cur feceris atrum:

Anni principium sit sine nube novi!

[consus]

Laeta mente via solita proficiscor in urbem,

Sed stupeo: taeter squalor ubique - nefas!

Annum mortales telis spargentibus ignem

Allexere novum fulminibusque vagis.

Sed stomachor multum: telorum fragmina foeda

Abscondunt plateas commaculantque vias.

[Francogallus]

Annum novum bis millesimum decimum felicem faustumque omnibus precor !