Abhinc ... annos

[Zythophilus]

Sese Napoleo conferre coactus in Iluam

denique in exilium mox rediturus abit.

[Tiberis]

Ut sese eriperent suis catenis
toto in orbe operarii, volebat
Marx, hic quem genuit dies ducentis
annis. Sed tua, docte, disciplina
eventus habuit quidem nefandos.
Nescio an fuerint tui daturi
te ipsum ad supplicium asseclae furentes,
casu si tibi iniqua sors fuisset.

[Zythophilus]

En, tibi nascenti, Carole, unda locuta Mosellae est;

iam duo sunt ex hoc saecla peracta die.

Diceris oeconomus, sapiens. Propter tua dicta

plurima caesorum milia turba tacet.

[Tiberis]

Illi, qui instituere disciplinam,
nil fecere mali. Nam abhorret omni
Christus crimine, quotquot asseclae eius
commisere nefanda per furorem.
absolvo Carolum, sed est timendus,
qui, quidquid docuit magister eius,
depravat populique disciplina
vult opprimere cogitationes.

[Zythophilus]

Qui praecepta sequi Caroli uoluere magistri,

his bene dilecti cognita uerba uiri.

Vt ui plebs, monuit, locupletes, ille, fugaret.

Vis sic discipulis iusta, neque error erat.

[Zythophilus]

Nascitur in Tuscis Marcellus papa futurus.

Nomen, cum fuerit papa, tenebit idem.

[Zythophilus]

Vae, Sanctae Sapientiae sacrati
templi tecta ruunt. Iubet peritos
Augustus reparare id architectos.

[Zythophilus]

Mortuus est Romae Benedictus papa secundus,

qua paruus fuerat natus in urbe puer.

[Tiberis]

Arma silent. veniunt Germani in deditionem.

Belli, cum iaceat, terra furore caret.

[Zythophilus]

Ad noua coepit iter quartum Ligur arua Columbus

praecipiens per aquas quattuor ire rates.

[Zythophilus]

Ad noua coepit iter primum Vespuccius arua,

cuius nomen iis nouimus inde datum.

[Tiberis]

Quae decem annos degerat occupata,
impetravit denique pactionem
publicam victoribus approbatam
Austria felix.

[Zythophilus]

Altera quae fuerat coniunx, ne iam foret, Anna,

praecidunt miserae rege iubente caput.

[Zythophilus]

Qui petens Indos mare naue magnum
nauta clarus transierat nouosque
inde agros conspexerat, est Columbus

morte peremptus.

[Zythophilus]

Nascitur in Venetis uir nomine Barbarus olim,

quem mors eripiet, Romule, in urbe tua.