Ubi "ille" sit, resciscere velim

[ThomasVulpius]

Salvete, coryphaei!

Complures iam dies ille artis *stilisticae dominus et deus hoc in foro nihil scripsit.

Ubi ille sit, resciscere velim.

Ille, quem omnes puellae et formosae et sedulosae et ingeniosae efflictim amant, huc quam celerrime revertatur!

Sin aliter renascar et multas vitas miserrimas agam, dum, ubi ille sit, resciero.

Bene valete et illum quaerite!

Thomas vester, indagator illius

[marcus03]

Ubi ille sit, resciscere velim.

Heri hic versatus est:
viewtopic.php?f=24&p=304952#p304952

Memento Illi hoc tempore ob examina perficienda maxime sudandum esse.

[ille ego qui]

hahahae!
valde gaudeo Thoman usque adeo de me curare
verissime autem dixit Marcus noster. cras enim mea de foro Romano scientia temptabitur a viro archaeologiae peritissimo temptabitur, septimanis insequentibus de Persio et tum de rebus Germanisticis examinabor. eheu

bene valete.

[ThomasVulpius]

hahahae!
valde gaudeo Thoman usque adeo de me curare

Est autem quaedam puella et formosa et ingeniosa, quae te, hominem per te cognitum, valde desiderans per omnes amoris gradūs ad caelum extulit.

[ille ego qui]

ohe satis! :p

sed cedo: cur per me cognitam? non intellego

[ThomasVulpius]

ohe satis! :p

sed cedo: cur per me cognitam? non intellego

homo per se cognitus = Selfmademan (CIC. Catil. 1,28)

[ThomasVulpius]

Quam diū patientiā nostrā abūtēris?
Quem ad fīnem sēsē iactābit absentia tua?
Quid proximā, quid superiōre nocte didiceris, quibus in bibliothēcīs versātus sīs, quae examina subieris - quem nostrum īgnōrāre arbitrāris?
Oblivīscere exāminum studiōrumque! Absentiam tuam nōn feram, nōn patiar, nōn sinam. Lūce clārior est ista tua artis *stilisticae scientia *supernātūrālis ac paene dīvīna, sine quā vīvere nōn iam possumus. Quī potest nōbīs haec lūx aut huius caelī spīritus esse iūcundus, cum sciāmus diem noctemque manūs tuās libellīs īnsūdāre?
Ī tandem aliquandō, quō tē ista tua Latīnē loquendī cupiditās effrēnāta ac furiōsa rapiēbat!
Nimium diū illud Latīnē loquendī forum tē exspectāvit!
Cōnfer tē ad forum, excitā omnēs Latīnē loquendī coryphaeōs! Addūc tēcum etiam omnīs puellās et fōrmōsās et ingeniōsās! Sī minus, quam plūrimās!
Ēgredere aliquandō ē studiōrum ūniversitāte!
Patent portae! Intrā forum!
Hī omnēs Erlangēnsēs, quōrum mentēs arte Latīnē loquendī imbuēbās, tē ūsque ad portās prōsequentur.
Exīre ē studiōrum ūniversitāte tē iubet dea Durga, quae tigride vehēns rērum ūniversitātem regit.
Num in forum Latīnē loquendī? Nōn iubeō, sed sī mē cōnsulis, suādeō.
Videō enim in *locutōriō *Scypicō quandam puellam, quae tēcum ūnā esse maximē cupit.
Ō tempora! Ō studia!
Hīc tū quā laetitiā perfruēre, quibus gaudiīs exsultābis, quantā in voluptāte bacchābere, cum in tantō numerō tuōrum et audiēs virōs bonōs Latīne loquentīs et vidēbis! Ad huius vītae studium meditātī illī sunt, quī feruntur, labōrēs tuī - argūtiīs *stilisticīs prōpōnendīs nōs docēre, in *locutōriō *Scypicō cum amīcīs Latīnē colloquī, īnsidiārī somnō nōn sōlum pigrōrum vērum etiam stultōrum.