carmina natalicia scribamus!

von **ille ego qui** » So 17. Dez 2023, 13:16

Perpulchra interpretatio! Gratias tibi ago! :klatsch:

von **Zythophilus** » Mo 18. Dez 2023, 11:43

Natalem Domini notissima cantica laudant

atque abies poscit carmina mille uirens.

Omnibus in plateis potantur feruida uina

cinnameoque latex complet olore nares,

dum recinunt suaues metra passim cognita uoces

et tacitam noctem iam iubet esse melos

et pax per puerum cantatur in orbe creata

stellaque accipimus tres duce adisse magos.

Grata silere niuem de caelo Musa cadentem

et rigida audimus stagna quiete frui.

Ante diem festum iam plena est carminis auris

inque mea efficitur nausea fauce sono.

von **Tiberis** » So 24. Dez 2023, 16:20

Natalem Domini precor beatum
vobis et placidum, bonum et quietum.
Absint sollicitudines acerbae,
absit, menti animoque quod molestum est.

von **Zythophilus** » So 24. Dez 2023, 17:02

Angelicas choreas, homines, audite, fideles,

quae natum Dominum nocte dieque canunt.

Cur stabulum et puerum dubitatis adire iacentem,

quem uigilante bona faena parente tegunt?

Hic iacet aeterni genitoris filius ortus,

qui moriens nobis gaudia uera dabit.

Hic stant in stabulis et fortis bos et asellus

atque animans Dominum nouit utrumque suum.

Mens quibus est, etiam debetis noscere regem,

nam natus Maria matre redemptor adest.