de "huic" disyllabo

[ille ego qui]

salvete sodales,
suntne loci poetici, quibus "huic" verbum in duas syllabas discedat?
modo hoc epigramma sepulcro inscriptum mihi occurrit:

Hospes adhuc tumuli ni meias ossa precantur
Nec, si vis huic gratior esse, caca!
Urticae monumenta vides. Discede cacator!
Non est hic tutum culum aperire tibi.

ubi etiam longitudinem "u" litterae miror.
suntne alia exempla?
bene valete

ecce fontem:
http://www.rubricastellanus.de/seite9.html

[durgicola]

epigramma pompeianum

epigrammata pompeiana plerumque mendis scatent

[Zythophilus]

Nomen feminae illic sepultae "Vrticam" fuisse dicunt. Nonne potius herba, quae eo loco inueniebatur, causa fuit? http://thetreatmentherbs.com/wp-content ... nettle.jpg

[Zythophilus]

In imagine, quam Durgicula praebuit, uidere possumus, quali forma littera "V" (uel "U") esse soleat. Ea in compositione litterarum, quam "huic" esse ferunt, talis littera non est.

[Tiberis]

Nec, si vis huic gratior esse, caca!

nonne in epigrammate illo Pompeiano NAM, si vis legitur? "NAM" non modo multo est aptius, sed etiam cum lege grammatica congruit, quae monet, ne, si quem vetamus aliquid facere, coniunctione "nec" utamur.
praeterea vehementer dubito, num lectio "huic" cum scripto conveniat,primum, quod aliena est a legibus metricis, deinde, quod littera u aliter scribi solet, denique, quod in obscuro manet, ad quem "huic" pertineat.
equidem opinor legendum esse "(i)llic " , sive dativus id est (illic,-aec,-uc) sive adverbium (illic).

[durgicola]

adstipulor tiberi (fortasse illis C scil. ossibus legendum est); ceterum duo disthica nec unum epigramma cil IV 8899 esse videtur, fieri potest ut quis distichon unum scripserit et aliquis alius alterum