De somnio hesterno meo

Quo in foro Latine colloquamur!

Moderatoren: Zythophilus, marcus03, Tiberis, ille ego qui, consus, e-latein: Team

De somnio hesterno meo

Beitragvon durgicola » Mi 21. Jan 2015, 14:14

Tempus erat lassos quo somnus repit in artus
Et nox sidereo vellere cuncta tegit
Me mihi sum visus per somnia mira videre
Radentem sicco Thetyos arva pede
Est mihi caeruleas visus fugisse sub undas
Deucalioneis obrutus orbis aquis
Ecce, triremis adest sancti praetoria Papae;
Aequora verrebant hac duce mille rates.
Quanto Luna micat quam cetera clarior astra
Cum pleno iunctis cornibus orbe nitet
Tanto navigiis cunctis praestantior illa
Ibat, eratque decus totius una gregis
En, venit ignivomis telis instructa librisque
Classis, et egregiam poscit in arma ratem
Per mare fluctisonum tristis bacchatur Enyo
pugnandi gliscit viscera in ima furor
Tunc inflata cient navalem classica Martem
Nec pavet illatas hostis ab hoste minas
Utraque concurrunt adversis agmina proris
Omnes una rates sors eademque manet
Haud secus accensos in mutua funera fratres
Anguigenas, memorat fama perisse vetus
Oedipodionidae sic depugnasse feruntur
Dum iacuit leto frater uterque pari.
Mox, animae sontes Acheruntia claustra relinquunt
Impexaeque comas anguibus Eumenides
Nec mora, Tartareae caligine noctis oborta
Tempestas in aquas desuper atra ruit
Fluctibus e canis geminas extare columnas
Vidi, prospectus gurgitis unde patet
Altera, sacra Dei genetrici vertice summo
Fulcit Diviparae Virginis effigiem
Altera, salvificum suffulcit corpus Iesus
Qui nigram triduo post Styga liquit ovans.
Interea coepit totum miscerier aequor;
Huc illucque rates impia iactat hiems.
Quantus caelicolis propior qui surgit Olympus
Aetnae tangentis nubila quantus apex,
Excelsum tanti contingunt aethera fluctus:
In priscum redeunt aer et unda Chaos
Aequora cuncta gemunt diris agitata procellis
Vix rabiem venti lintea ferre queunt
Nec tamen idcirco pugnae deferbuit aestus
Quin potius Mavors saevit utrimque magis.
Versatur Papae magno in discrimine classis:
Hinc acies, illinc Nereus urget eam.
Tum socios navesque vocat sibi Papa fideles
Placandis curis aptaque verba refert
ingruit hostica classis
Et classem Papae pergit ut ante sequi
Iamque hostes aderant propius cum Papa repente
E nimis insano gurgite raptus obit
Sic bis efficiunt hostes ne contio fiat,

Papa novus classis moderandae sumpsit habenas
Totius huic belli tradita summa fuit
Protinus ad geminas festinat Papa columnas
Et pius ad coelum tendit utrasque manus
Fundit more preces, decedunt nubila et hostes
Orantem Domini Gratia prosequitur
Benutzeravatar
durgicola
Proconsul
 
Beiträge: 450
Registriert: Mi 30. Jan 2013, 17:26
Wohnort: Pleroma, Roma, Tampa (Florida) Zombi (Kenya)

Re: De somnio hesterno meo

Beitragvon Zythophilus » Mi 21. Jan 2015, 18:44

Hercle, tot efficiunt tua somnia disticha docta,
mollia uti uersus stragula ferre putem.
Hexametros solos si tradiderit tibi Morpheus,
Iliaco maius carmine habebis opus.
Zythophilus
Divi filius
 
Beiträge: 16845
Registriert: So 22. Jul 2007, 23:10
Wohnort: ad Vindobonam


Zurück zu Latine loquendi



Wer ist online?

Mitglieder in diesem Forum: 0 Mitglieder und 19 Gäste