Prudentius hat geschrieben:Der "status miserrimus" betrifft ja nicht nur dieses Forum, sondern unser Fach allgemein, und auch andere Fächer wie Geschichte, Kunst, Literatur, Religion und Philosophie: das wird alles nicht mehr gebraucht.
Mirum quidem non est, quod Latinitas in tanto versatur discrimine, si nos ipsi lingua Latina , cuius cultores custodesque habemur, rarissime tantum utimur. Mirum non est disciplinam nostram parum apud discipulos valere, si magistri parum edocti, quantam illa auctoritatem habeat in pueris erudiendis, nesciunt eaque tantummodo ad discipulos coercendos abutuntur. Nulla fere disciplina invenitur, quae magis ad eruditionem, quae dicitur generalis, pertineat quam nostra. Tamen haud ignoro talem eruditionem, quae ad mentem vere liberam adipiscendam tendit, ab illis, qui in re publica versantur, parvi aestimari. Qui cum dictitare soleant, quanti sit eruditio, mentes vere liberas timentes non de illa generali quidem cogitant eruditione, sed de "eruditione" speciali, qua adulescentes aptiores fiant ad negotia gerenda.
Quamobrem ne miremur de tristissimo disciplinae nostrae statu neve de perdita eruditionis libertate , praesertim cum ii, quorum auctoritas apud plebem multum valet, summa ope id agant, ut cives arbitrio suo subiecti sint. Quid? Nonne ubique fit, ut libera mens civium parvi aestimetur? Nonne ubique fit, ut civibus, quid cogitent quidve sentiant, praescribatur? Num quid est diversitatis in actis diurnis? Num quid est diversitatis in artibus litterisque, ubi iis tantum favetur, qui idem sentiant ac potentes? In ipsis theatris , cum dispositores opera auctorum ad suum deforment arbitrium, spectatoribus facultas interpretandi negatur.
Civitas libera sine libertate cogitandi dicendive esse non potest, Quid autem aptius est ad mentem liberam adipiscendam vel colendam quam eruditio ab omni necessitate oeconomica libera? Latinitatem colamus ad libertatem nostram servandam!