aenigmata

[Tiberis]

res est soluta. gratulor! novum pone!

[Zythophilus]

Pannonia in media lacus ingens litora pulsat,

paruaque cauponas oppida, uti fit, habent.

Pisces eius edunt; quem nutriit unda marina,

assant igne tamen saepius his et edunt.

Quaerimus ex uobis, qui piscis edatur et unde

mortuus ad stagnum Pannoniosque migret.

[consus]

Aenigma tuum, optime Zythophile, puto esse de celeberrimo illo pisce qui Sander lucioperca appellatur. In Lacum Pelsonem pervenisse dicitur e mari per Danuvium fluvium et per Sió fossam quae lacum cum Danuvio coniungit. Nescio an errore ducar...

[Tiberis]

quod praeacutos Sander ille habet dentes,
ab Hungaris ipsis fogas solet dici.
qui vivit in Pelsone, dicitur süllö.
qui sült ,id est assatus, aptus ad cenam est.

[Zythophilus]

De qua sim, uestrum scit uterque, palude locutus;

piscis et a uobis huic memoratus inest.

Quaeritur - en - alius, nam non alit alta paludis

unda, sed Oceani sustinet aequor eum.

[Zythophilus]

Tangere non solet has alienus squamiger undas,

sed solet in stagni litore piscis edi.

[consus]

Novissimis versibus tuis lectis aenigma suspicor esse de Merluccio hubbsi, quem Hungari hekk ("sült hekk") appellant. Importatur ex Argentina.

[Zythophilus]

Quamquam Pannoniae nescit Merluccius undas,

eius apud stagnum uiscera tosta uorant.

Gratulor ex animo tibi, nam scis, Conse, paludes

squamigerosque citos et, fluuii quod habent.

[consus]

Amicis suis spectatissimis sal.
Ignoscite quaeso quod hodie carmen facere non possum; flammeus enim solis fervor mentem obsidet…
Sed ad rem:
Imperator quondam, ut duo fluvios qui paribus fere intervallis in mare influunt inter se coniungeret, fossam fieri iussit. Cuius constructio ad finem non est deducta, sed id quod reliquum est etiamnunc non mediocrem nobis efficit admirationem. Iam CC fere annis ante simile in eadem regione opus incohatum est. Eius quoque reliquiis etiamnunc admiratione afficimur.
Quae fossae?

[Tiberis]

Tiberis Conso suo s.d.p.

Anno MDCCCVI Napoleo fossam faciendam curavit, quae Mosam Rhenumque inter se coniungeret (fossa septemtrionalis). altera fossa ad eosdem fluvios inter se coniungendos saeculo XVII. Isabella Clara Eugenia Philippi II. filia navante inchohata est, a qua nomen cepit (Fossa Eugeniana).

[consus]

Fossas has Tiberis sciens retexit,
Responsa et dedit insuper petita.

[Tiberis]

Amicis litteratissimis sal.

Donatus rude degit in casella
aestates operarius modestus,
casu qui mutilatus est iniquo.
Lustris praeteritis novem licet nunc
rem nostra quoque lectitare lingua.

quis liber? quis scriptor?
nomen operarii?

[consus]

Consus amico suo litteratissimo s. d. p.
Aenigma videtur esse de libro qui inscribitur Der Sprengmeister (2018) vel Bergsprängaren (1973) (forsitan Latine "De magistro rerum detonantium" ). Scripsit opus Henning Mankell. Operarii nomen: Oskar Johannsson.

[Tiberis]

tu, mos ut tuus est, virum librumque
invenisti aquila ocius volante.
gratulor tibi, amice litterate!

[consus]

Construxit instrumenti vir sollers novum
Genus: pulsatis malleo chordis sonos
Audimus grandes: protenus mentes movet
Effectus aeri par percusso personans.

Quae chordae? Quod instrumentum, amici?