Vita cum careas, mihi mortua, Roma, uideris,
hic tibi natalis cum sit agendus atrox.
Errantes homines pestis legesque fugarunt
nec sua iam ciues linquere tecta sinunt.
Vere salutarent fora milia multa tepente.
Innumeri tererent saxa uetusta pedes.
Vere uagaretur uicisque uiisque uiator,
frigida cui caupo uina cibosque daret,
sed manet ipse domi perterritus incola rebus,
in plateis solitus stare loquique prius.
Nec tua uisurus miracula iam uenit hospes,
aurea Roma: uacat Circus, arena, forum.